Vawiin khan Parliamentary Secretary Pu Joseph Lalhimpuia chuan Champhai District Education Committee thutkhawm vawi 27-na hmanpui a. He hun, Champhai DC Conference Hall-a neih hi Champhai DC Pu Zoengsanga chuan kaihruaiin, district chhunga SSA leh RMSA hnathawh leh hmalak zel dan tur thlir in sawiho a ni.
Pu Joseph Lalhimpuia chuan SSA leh RMSA hnathawh chu langtlang taka kalpui a nih thu leh hmunhma siam a hmalakna hrang hrangah pawh thawktuten an thawk tha hle a ni, a ti a. Amaherawhchu project tha tak tak siam a sum tam tak lakluh chu SSA leh RMSA hlawhtlinna a la tlinglo a ni tiin, zirlaiten an zirlaiah leh thil dangahte hmasawnna an neih a, ziak leh chhiar thiam an pun belh chu hlawhtlinna tehfung pawimawh ber zawk a ni, a ti a. Tlawmngai pawlte pawhin department hmalakna chu lo ngaihvenpui a, tih dik tawk lohte a awm a nih chuan meeting-ah sawi hreh lo turin a sawm a ni.
Parliamentary Secretary chuan Education Department-in zirlaibu mai piah lama infiamna leh thiam thil hrang hrang chawisan a tum thu sawiin, zirtirtute pawhin naupangten an talent neih tha tak tak te chu an haichhuah thiam a ngai a ni, a ti a. Zirlaite chu an hun tam zawk zirtirtute bul a hmang an nih avangin school zirlai mai bakah nun dan tha leh Mizo nun mawi tlawmngaihna inzirtir thlengin an mawhphurhna a nih thu a sawi a. SSA leh RMSA thawktute chu statistics felfai leh rintlak taka vawng turin leh, monitoring tha taka wm se a tih thu a sawi a ni.
Meeting kaihruaitu DC Pu Zoengsanga chuan zirna kawnga district-in hma a sawn theih nan member ten thahnemngai taka an ngaihtuahna seng turin a sawm a. Audit chungchangah harsatna a awmloh nan pawisa hmannate felfai taka chhihchhiah zel ni se tiin, district administration lamin an puih theihna a nih chuan harsatnate inhrilh hreh loh turin member-te chu a sawm a ni.
Vawiina meeting-ah hian Education Department leh RMSA & SSA officials leh hnathawkte bakah Department danga office hotute an tel a. Kum 2014-2015 Annual Work Plan & Budget for RMSA & SSA chu vawiin meeting-ah hian en ho nghal a ni.
