National Disaster Response Force (NDRF) Guwahati te chuan vawiin chawhma dar 10:00 atang khan Govt. Champhai College ah Familiarization Exercise neiin rikrum thila mihring nunna chhan dan entirna hun an hmang.

Champhai District Bawrhsap Pu Sangdingliana, IAS chuan he programme hi hmanpuiin National Disaster Response Force Bn. Guwahati ten sawmna ngai pawimawh a he hun an rawn hmanpui theih avanga lawmthu sawiin chhiatrupna lo thleng thut thei turah theih ang tawk a Champhai a inbuatsaih dan leh hemi kawnga mipuite lo in ralrin lawk dan tur te pawh tun aia nasa zawka puanzar a tul thu a sawi a. India ram mai nilo, khawvel pumah khuarel chhiatna hi a thleng fova, lirnghing, tuilian, leimin, in chim, kangmei leh a dangte a thlen thin avangin hetiang a zir lawkna lo neih a pawimawhzia leh a tangkai thu te sawiin District Bawrhsap chuan mithiam ten hetiang a zirtirna an neih hi hmang tangkai thiam turin zirlai kalkhawmte leh sorkar department hrang hrang leh NGO atanga lo kal khawm te chu a chah a ni.

Pu Benjamin Lalzama, SDO (Sadar) chuan he training programme hi a kaihruai a. Tun laiah chhiatrupna a thlen fo avangin hetiang hunah zirna leh thiamna bik nei lova mipui nawlpuiin kan chim huk thin ang hi kalpui ngawt chi a nih loh avangin kaihhruaina fel leh mumal tak neia hun hman a that thu leh hemi kawnga Champhai in hma an lak dan a sawi bawk.

NDRF Bn. atanga lo kal Inspector B.S. Rangi chuan 19th January, 2006 ah India ramah din tan (established) a nih thu leh training an pek dan hrang hrang te power presentation hmang in a hrilhfiah a. Nunna chhan dan hrang hrang a tak (practical) a entir a ni bawk a ni.

NDRF Bn. Guwahati atanga lo kal te hian Champhai District chhunga Ngopa leh Khawzawl khuaah te hetianga zirtirna hi pe turin an kal leh ang.