Vawiin chawhma khan Aijal Club ah Mizoram State Legal Services Authority(MSLSA) chuan ruihhlo hmansual leh a dona kawnga hnathawktute hmalakna tanpui turin nikhat awh ‘seminar on sensitization of stake holders in issues relating to drug abuse and drug trafficking’ a buatsaih a. He hunah hian Law Minister Pu Lasawta, Gauhati High Court Judge pahnih Justice L.S. Jamir leh Justice Ujjal Bhuyan te, Mizoram University Vice Chancellor Prof. R.Lalthantluanga, Law & Judicial Secretary Pu P.Singthanga leh sawrkar mi pawimawhte an tel a. Ruihhlo dona kawnga hmalatu hrang hrang ; Court judge-te, Excise Department, Home Department, Ukil-te, Health Department, SHALOM, CHAN leh NGO-ten seminar hi an chhim a ni. Seminar hun 3 a then ah hian mithiam ten ruihhlo dona kawnga dan leh hrai hman mek chungchang bakah ruihhlo ngaite enkawlna a sawrkar leh tlawmngai pawlte mawhphurhna hrang hrang chungchang ah te zirtirna an pe a ni.

Law Minister Pu Lalsawta chuan ruihhlo dona leh ruihhlo enkawlna kawngah sawrkar hmalakna in rah a chhuah mek a, hlawhtlin sawi tur a awm nual tawh mahse tan chhoh mar pat erawh a ngai chhunzawm thu a sawi a. Thalai beiseiawm tak tak leh ram tana mi tangkai tur tam tak ruihhlo bawih ah an tang mek a, sawrkar hmalakna ah duh tawk mai lovin tlawmngai pawl te leh khawtlang ang pawh a nasa zawka ke kan penrual a ngai a ni a ti.

Thusawitu dang Justice L.S. Jamir chuan N.E. State hrangah ruihlo vangin nunna tam tak hloh a ni mek a, thahnemngai taka inzirtirna leh hmalakna a awm vat loh chuan human resource tam tak kan chan belh zel dawn in a lang a ni a ti a.International boundary sei tak leh state dang te nena ramri thui tak nei Mizoram chu ruihhlo hmansualna lakah leh ruihhlo tawlh rukna kawng in a paltlang vangin fimkhur zual a ngai a ni a ti. Heng ruihhlo dona kawnga hmalatute hi dan bakah tanpuina kawng hrang hranga thawm that an ngaih thu a sawi a ni a. MSLSA Executive Chairman Justice Ujjal Bhuyan pawhin a thlawna ukil rawih theih chungchang sawiin Mizoram mipuite chu ziak leh chhiar ah an sang tawh hle nachungin Legal awareness bikah hmasawnna tur an la nei tam hle nia a hriat thu a tarlang a. Dan leh hrai chungchanga mipuite tanpui turin MSLSA chuan theihtawp a chhuah mek a, rilru lama rualban lo te dan leh hrai chungchang bikah tanpui turin free legal service for mentally unfit person din tuma hmalak mek a ni a ti.

Seminar hawnna inkhawm hi Pu Joel Joseph Denga, Member Secretary, MSLSA in a kaihruai a. Statutory mandate : introspection of enforcement chungchang Pi Chhaya Sharma, DIG(CID), Pu Vivek Kishore, DIG(TRG) leh Pi Lucy Lalrinthari, Special Judge, ND&PS Act ten zirtirna an pe a. Challenges in rehabilitation of victims of drug abuse & drug trafficking chungchang bikah Pi Vanlaldini, Director, Social Welfare Department, Pu Lalsawma Pachuau, Joint Director, Health & Family welfare leh Capt. Vanlaltluanga, Social secretary, CHAN ten zirtir pe leh in Brother, Dr. Varkey M.T. leh Dr.Chawnglungmuana, Director, SHALOM ten Sawrkar, NGO-te leh Court mawhphurna an sawi thung a. Seminar kharna ah hian Supreme Court Judge pahnih justice Anil R.Dave leh Justice T.S. Thakur te pawh an tel a ni.