Champhai District chhunga lirthei tlan te himna hapta Road Safety Week hman tur chu tukin zing khan Champhai SP Pu RP Meena chuan Champhai Chanem Building tualah a hawng a. He hun hi Champhai District Transport Officer (DTO) Pu K. Lalhmuakliana'n kaihruai a ni.

Champhai SP Pu RP Meena chuan tunlai a mihring khawsak chetvel nana kan hman tam ber lirthei laka mitinte kan him tlan leh zual theihna tura Sorkar in a bika Road Safety Week a buatsaih chu thil lawmawm tak anih thu leh he hapta hian lirthei enkawltute leh lirthei hmangtute tan kum tluana fimkhurna leh himna thlentu ni thei se a duh thu a tarlang a. India ram pumah kumtin lirthei chetsualna vanga Champhai mipui zat dawn nunna hlu tak an chan thin tarlangin, chetsualna thlentirtu tam berte chu pumpelh theih a nih laiin, lirthei enkawltuten dan an palzut vangte leh lirthei khawl enkawl that tawk loh vanga heng chhiatna te hi thleng thin a nih thu a sawi a.    

Pu RP Meena chuan Champhai District chhungah lirthei a chetsualna leh vanduaina thleng thinte pumpelh anih theih nan lirthei dan leh hriate ngai pawimawh a he Road Safety Week thupui a tana thlan "Time for action" tih chu a taka kalpui theuh turin mitinte a sawm nghal bawk.

State Level Road Safety Council in a ngen angin Police Department leh Transport Department tangkawpten vawiin atangin lirthei chevelte ngun leh zuala an enfiah dan bakah lirthei lehkha pawimawh an endik nghal a.  February ni 11 leh 15 hian lirthei neitu leh enkawltute hnenah Police leh MVI ten dan leh hrai zirtirna an nei ang.

Vawiin Road Safety Week hawnna hunah hian Dan leh thupek kengkawhtute, Lirthei chi hrang hrang khalhtu leh enkawltu Pawl hruaitute, Sorkar Department hotute, Media mite leh Tlawmngai pawl hruaitute an tel a ni.