Vawiin 11:30 a.m hian Lawngtlai DC Conference hall ah Lawngtlai District Road Safety Week 2016 hawnna inkhawm neih a ni a, District Transport Officer Pu Lallawmawma, MCS in a hawng a ni.

Thusawiin Pu Lallawmawma chuan, lirthei khalhtute hi mipuite nunna chunga mawhphurtu an ni a, fimkhur tak leh him taka mipuite kal duhna hmun min thlen thin tura beisei an ni bawk. Chutihlaiin mi thenkhat fimkhur tawk lote avangin nunna hlu tak chan takna pawh a awm nual awm e. Hetianga fimkhur tawklohna avanga lirthei chunga channa rapthlak tak takte a thlen zel loh nana inzirtirna hunah Road Safety Week hi kum tin hman thin a ni a ti. He Week hman chhung chauh hi fimkhur hun emaw kan ti ang tihte pawh a hlauhawma engtiklai pawha fimkhur reng tur kan nih thu inhrilhhriatna atan kan hmang zawk tur a ni, tiin kalkhawmte a chah a. Kawngsira ke a kal thin mipuite pawh fimkhur tak leh kawnga lirthei kal velte ngaichang reng chunga kawng kal thin turin a ngen bawk.

Road Safety Week hawnna inkhawm hi Pu F. Lalhmachhuana, District Council Transport Officer in a kaihruaia, Pu Joseph Lalthansanga Pachuau, MVI Lawngtlaiin lirthei khalhtu kalkhawmte chu MVI dan chi hrang hrang a zirtira, Pu R. Liankunga, Zoram Driver Union aiawhin lirthei khalhtute tana nungchang mawi leh awmdan tha chungchang zirtirna a nei bawk.

Road Safety Week hawnna inkhawmah hian Lawngtlai khawpui chhunga lirthei chi hrang hrang khalhtute leh District huapa lirthei khalhtu pawl hrang hrang aiawhte an tel a ni.