27th Road Safety week chu vawiin khan a hawnna Mamit DC  Office tualah neih niin, Pu H.Lianzela, Addl. Dc in a hawng.

Road safety week hawnna inkhawm hi Pu LT Zodinliana, DTO, Mamit in a kaihruai a. Pu Gaston Vanlalhriatpuia, SDC chuan road safety week hman dan tur tlangpui sawiin, he week chhung hian  Taxi, Maxi-cab leh Sorkar driver tha thlanna mipui vote hmanga neih a nih tur thu leh he week thupui atan 'Time For Action' tih hman a nih thu a sawi a.

Thusawitu dang Pu F.Lalthlamuana, SDPO,Mamit chuan kum thum kalta chhunga Mamit district chhunga motor chetsualna thlen dan tarlangin;

i) kum 2013-ah case ziahluh = 4 , thizat= 5, hliam tuar = 4 (2 fatal)

ii) kum 2014-ah case ziahluh = 4, thi zat = 4, hliam tuar = 5(minor)

iii) kum 2015 - ah case ziahluh 2, thi zat = 2, hliam tuar = 2(minor),

Traffic Rules bawhchhia pawisa chawitir atanga hmuh zat chu Rs.26,300/- a nih thu a sawi bawk.

Khuallian Pu H.Lianzela chuan  lirthei chu a khalhtu a zirin a hlauhawmin a hlauhawm lo thei ani a ti a, chetsualna 70% hi driver fimkhur loh vang anih thu a sawi a. Traffic Rules hriat that leh zawm a tul thu sawiin, kawngpui him kan neih theih nan Transport Department leh Police te kuta dah mai lovin kan vai mawhphurhna a ni tih kan hriat a tul a ni a ti bawk.

He week hawnna a kalkhawm te hnenah road safety week sticker a thlawna a sem a ni.