Vawiin khan Mizoram pumah 'Road Safety Week' hman tan a ni a, Lunglei-ah pawh DC Pu Abhijit Vijay Chaudhuri chuan he 'Road Safety Week' hi a hawng.

He Road Safety Week vawi 27-na hawnna inkhawm Lunglei DTO Pi Saizikpuii kaihhruaiah Pu Abhijit Vijay Chaudhuri chuan lirthei khalhtute traffic rules inzirtirna hun leh fimkhur tura inchah hun tha tak buatsaih a nih hi a lawmawm hle a; sorkarin mipuite himna ngaipawimawhin 'Road Safety Week' hi kum tin a hmang thin a ni, a ti a. Week hman chhung chauh ni lo, engtik lai pawhin lirthei khalhtute chu fimkhur an ni a, rui chungin lirthei khalh lo tur leh chak lutuka lirthei khalh hi ching lo turin a chah a, lirthei khalhtu zawng zawngten Traffic Rules and Regulations hriat chian an tum tur a ni, a ti.

Lunglei SP Pu Zosangliana pawhin thusawiin traffic chungchanga an hmalakna hrang hrangte a tarlang a, lirthei khalhtute chu Traffic Police-te ngaichang thiam a, hawihhawm taka thu kan zawm tlan hi a pawimawh a ni, a ti a. Lirthei neitute chu document pawimawhte felfai taka vawng tura chahin Lunglei SP chuan sorkarin traffic chungchang leh thildangah thupek leh Dan a siamte chu thuawih taka zawm a ngai a. Lirthei khalhtuten kawnga kal mipuite ngaichang thiam tur leh chutiang bawkin mipui te pawhin him zawk nan lirthei tibuai zawnga awm lo turin a chah bawk.

27th Road Safety Week hawnnaah hian Pu Zairemthanga Sailo, President, ZDU (Lunglei) pawhin lirthei khalhtu zawng zawngte Dan zawm tha turin leh fimkhur turin a fuih a. He Week pual hian lirthei khlahtute leh kalkhawm zawng zawngte hnenah 'Driver-te Hriattur Pawimawhte' tih handbook sem vek an ni bawk.