Vawiin khan Mizoram KVI Board buatsaih State Level Workshop on Prime Minister Employment Generation Programme (PMEGP) chu Chanmari YMA Hall-ah neih a ni a, Khuallian Shri Narayan Chandra Barkataky, Hon’ble Member KVIC (North East Zone) leh khualzahawm Pu K. Lianzuala, Chairman Mizoram KVI Board ten he hun hi an hmanpui.
Khuallian Shri Narayan Chandra Barkataky chuan, Mizo PMEGP beneficiaries te chu first generation entrepreneur an ni a, heti ang workshop buatsaiha harsatna hrang hrang awmthei sut kian dan tur inhril hriatna hun hman fo hi a tul tak zet thu a sawi a. Mizoram chu lekha thiam state a nih ang ngeiin PMEGP hlawhtlinna pawh hi beiseina sang tak nen kan thlir a ni, a ti. Kal khawmte chu ngaihtuahna fim tak hmanga an thil siam hralhna (marketing) lam thlenga ngaihtuahna neiin project siam thin turin a chah. Mizorama bank hrang hrangte chu fuihin, PMEGP beneficiaries-te chu zirtira theihtawp chhuahpui tur leh risk la ve ngam turin a chah bawk.
Khualzahawm Pu K. Lianzuala pawhin thu sawiin, State kan nih angin duat takin central sawrkar chuan chanvo mi pe a, central flagship programme PMEGP beneficiaries te chu loan an lak ang ang te chu rul leh vek thin turin leh tumruhna neia teirei peih ve turin a chah a. Financing Bank-te fuihin, District Level Task Force Committee (DLTFC)-in uluk taka a thlan beneficiaries te chu a rang thei ang bera loan sanction thin turin leh lo inhawng zau vea tawiawm thin turin a chah.
Pi Rualkhumi, Director KVIC State Office, Aizawl pawhin thu sawiin, Bank tel lo chuan eng mah an tih theih loh thu leh vbc. 9 atangin vbc. 2 chauh an la hman thu a tarlang a, tun financial kum ral hma ngei a hman zawh a nih theih nan bank hotute a fuih a, beneficiaries te chu loan repayment schedule chiang tak pe thin turin a chah a. PMEGP hnuaia loan late hi thingtlang-ah chuan margin money 35 % a nih laiin, kawpui ah chuan 25% a nih thu a sawi bawk.
Mizoram KVI Board, CEO Pu Kaisangzula’n inlawmna thu a sawi a, Industries Department leh State Bank of India (SBI) atang te pawhin thusawi ngaihthlak niin, mi rinawm leh loan rul tha tur beneficiary te chu an la duh reng thu SBI hotute chuan an sawi a ni. Workshop hi chawhnu lamah zawhna leh chhanna hun hman niin, sawi hona neih nghal a ni.
