Vawiin chawhma khan Mizoram Information Commission (MIC) leh Department of Information & Public Relations bultumin Govt. Champhai College Multipurpose Hall-ah Right to Information (RTI) Week, 2017 hawnna  hun hman a ni.

He hun hi Pu Vanlalngaihsaka, IAS Champhai Bawrhsap chuan  kaihruaiin RTI Week, 2017 hmang tura kalkhawmte lawmna thu a sawi a. Key note address Dr Lallawmkima, MIS, DIPRO champhaiin neiin RTI tobul leh pawimawhnate , hman anih dan leh a tumte a sawi bawk a ni. He hun bik atana Resourse person tura sawm Pu Lalthantluanga Tochhawng Lecturer, Govt. GM Higher Secondary School hnen atangin RTI Chungchanga hriattur leh inzirtirna ngaihthlak a ni a. Kalkhawm ten zawh belhna leh hriatloh zawhna hun an nei a, inrawnkhawmna leh sawihona hun hlawk thlak tak neih a ni. RTI Week puala College Zirlaite tana Slogan Writing Compettition buatsaih taka lawmman pakhatna dawngtu Tv B.Dosiampauva, Govt. Champhai College hnenah lawmman pawisafai leh certificate hlanna Bawrhsapin a nei nghal bawk a ni.  Pu Lalnunmawia Principal, Govt Champhai College-in lawmthu sawina neiin hun a khar a ni. 

Right to Information Act, 2005 hi May 11, 2005 khan Parliament-ah pawm niin President in June Ni 15, 2005 khan hming a ziah hnan a. Hemi kum vek October Ni 12, 2005 khan a duh apiangte hman theih tura chhawpchhuah a lo ni ta a ni. India ram mipui sawrkar ram ropui takah hian khua leh tui ten sawrkar kalhmang leh inrelbawl dan leh hnathawh dan an hriat ve hi an dikna leh chanvo a ni a. Hemi kawnga zawhna leh mamawh an neihte lo pek hi sawrkar mawhphurhna a ni.  RTI Act, 2005 hian sawrkar dik, langtlang leh innghahna tlak siam hi a tum ber niin chu chuan eirukna leh hlemhletna tihbo kawngah nasa takin a pui dawn a ni. Mi tupawhin Sawrkara hriat duh a neihte kha ziakin emaw, online hmang emawte pawhin a zawt thei a. Hemi lo bawhzui tur hian Department tinah mawhphurhna la tur officer-te ruat thin an ni bawk. 

Mizoramah Kum 2011 khan RTI Week hi hman tan a ni a. October Ni5-12 chhunga hman thin a ni. District tina hman thin niin Kumin a hmanna pui ber chu October Ni 5 khan Aizawl-ah Chief Minister Pu Lal Thanhawla ho a hman a ni a. Mizoram State Information Commisioner, Pu Lalduhthlana Ralte leh MIC hotu dangte pawhin  Lungleiah he hun hi October Ni 6  khan an hman pui ve bawk a ni. RTI chungchang zirhona State Level Workshop-te pawh an nei a ni.

Vawiin programme-ah hian Sawrkar hnathawk, chanchinbumi, khawtlang hruaitu, NGO aiawh ,College zirtirtu leh naupang thahnem tak an tel a ni.