October ni 2, 2017 a hawn Kolasib Cleanliness Week chu vawiin khan Diakkawn YMA Hall ah MIFCO Chairman leh Bialtu MLA ni bawk Pu PC Zoram Sangliana’n a khar.

Kharna inkhawmah hian khuallian chuan thu sawiin faina chu Pathian an teuhna ber a ni tiin faina hi a tanna emaw a tawpna emaw awm loin damchhunga chhunzawm reng tur a ni a ti. Thenawm khawveng leh hnamdang khualzin te laka min timawitu tur chu faina a nih thu a sawi a. Faina chu chhungkaw tin leh mimal tin atanga intan tur a nih thu sawiin khawtlang hruaitu tan phei chuan mahni inthunun mai bakah mahni in leh lo vel a fai hian midang tana entawn tur tha tak kan hnutchhiah a ni a ti. Mizote min ti hmel mawilotu chu vaihlo, zuk leh hmuam a nih thu a sawi a, mahni taksa chhungah tur kan inbarhlut mai bakah midang tan tur hlauhawm kan thehdarhin midang boruak hip tur tichhetu kan ni thei a ni a ti a. Zuk leh hmuam kawngah kan inthunun a pawimawh thu a sawi bawk.

Faina chungchanga Kolasib District chhunga Deputy Commissioner leh Sawrkar Department hrang hrangte leh NGO, khawtlang hruaitute hmalakna chu fakawm tiin Kolasib District mipuite chu ram leh Hnam tana faina meichher chhitu ni turin duhsakna a hlan a ni.

He hun hi Kolasib DC Pu R Zarzosanga’n a kaihruai a, Pu Mark Lalthanliana DUDO, Kolasib chuan faina chungchanga kawng hrang hranga inelna an buatsaih te chu Report pe in, faina chungchanga Category hrang hranga titha te hnenah lawmman semna hun hman a ni bawk a.

Category hrang hranga lawmman pakhatna dawngtute:

Middle School Fai  : Govt. TS Luaia Middle School

High School (leh a chunglam) fai   :  CZ Hr Sec School

Essay writing : C. Lalthlamuani

Hotel/Restaurant fai  : Mizo Hotel pui, Diakkawn

Home Fai : Enna In

Short Film : Lalchhanhima & Party

Khaw Fai : Lungdai

Opening Function a YMA Branch kal tha : Venglai Branch YMA

Office fai : PHE Department Office

Veng Fai: Khuangpuilam.

He hunah hian Faina kawnga mimal thahnem ngai kum 77 mi Pu H Lalchhunga hnenah Special Award hlan a ni bawk.