Vawiin chawhnu khan India ram hmun dang rualin Champhaiah pawh Economics and Statistics Department buatsaihin Statistics Day 2015 Govt. GM High School-ah hman a ni a. He hunah hian Pu CC Lalchuangkima, Project Director DRDA chu khuallian niin a hmanpui a ni.

Statistisc Day vawi 9-na lawmna hun hi Pi R Laldawngliani i/c DRO  in a kaihruai a. Khuallian Pu CC Lalchuangkima chuan thusawiin, ramin hma a sawn zel theih nan leh, harsatna kan tawhte sutkianna atana Statistics dik leh felfai neih a pawimawh thu a sawi a. Hnam changkang apiangin statistics nei that an tum laiin Mizo te hi thil chhianchhiah peih lo mi kan ni a, zirlai naupang changkang tawhte hi chuan thilchhinchhiah leh hre reng thei turin kan inbuatsaih tur a ni a ti a. Mizoram hian hma a sawn theihna turin thil record kan ngaihpawimawh a ngai a, data dik tak kan report ngamin mahni nihna dik tak angin kan lang ngam tur a ni a ti a. School naupang kalkhawmte chu mahni document leh certificate pawimawh dah thatna chang hre turin leh, Certificate ziah dawnin hming ziah dan te uluk turin a chah a ni.

Vawiin hunah hian Indian Statistician ropui Prof. PC Mahalanobis chanchin ngaihthlak a ni a. Chairman Pi Laldawngliani chuan department hmalakna thenkhatte tarlangin, Documents hming inziak inmil lo awm thin chu Economics & Statistics Department chuan tihreh tum a nih thu a sawi a ni.