Swachh Bharat Cleanliness Week chu Champhai District-a urhsun taka kar tluan hman a nih hnu in vawiin chawhnu khan I&PR Auditorium-ah a kharna hun hman a ni. He hun hi Champhai Addl. DC Pu C. Lalzarliana chuan kaihruaiin, thusawi ngaihthlak a nih bakah Cleanliness Week puala category hrang hranga faina intihsiakna a tihtha zualte hnenah lawmman hlanna hun neih a ni bawk.

Addl DC Pu C. Lalzarliana chuan ram changkang leh changkanglo thliar hranna awlsam leh langsar tak chu faina hi a ni, a ti a. India ramin faina kawnga hma a sawn zel theih nan mitinin thawh theih kan neih thu a sawi a. Kan inchhung leh a vel mai bakah tumah dang phut lo a kan bulhnai kawngpuite lo phiat han hmuh hi a lawmawm in, hmasawn tur pawhin min ti phur thin a ni, a ti.

Faina Hapta kharna puala thusawitu Pu C. Lalremliana chuan mihring nunah faina hi a pawimawh tak zet a, ram hmasawnna pawh a nghawng thei a ni, a ti a; Hrisel tur chuan faina a ngai a, mi hrisel chuan hna a thawk tha thei a, hnathawk tha chu a dehchhuah a tam nge nge a, mimal tin dehchhuah tam leh tlem hian ram hmasawnna a nghawng leh zel a ni, a ti a. Swachh Bharat Mission hnuaiah mitinin kum khat chhungin darkar 100 tal faina hna thawk tura a phut chu thil hautak a nih loh thu sawiin, Sorkar in ruahmanna lianpuia a kalpui hi mipuiten kan tawiawm loh chuan a hlawhtling theilo a; faina leh thianghlimna hi kan kutah a innghat a, neitu rilru kan put chuan khawilai mah kan ti tawp duhlo ang, a ti a ni.

Swachh Bharat Cleanliness Week pual hian Town Area huamchhunga Anganwadi, Zirna In zawng zawng, Sorkar Office, Veng leh Champhai Town Area (Census Town) zinga fai ber te hnenah lawmman hlan a ni a. Lawmman dawngtute chu:

Sorkar Office Fai Lawmman:

1) DRDA Office, Keifangtlang

2) DFO Office, Bethel Veng

3) BDO Office, Ruantlang

Anganwadi Fai Lawmman:

1) Zotlang III Anganwadi

2) Venglai I Anganwadi

3) Kahrawt II Anganwadi

Zirna In Fai Lawmman:

1) Govt. Kanan Middle School

2) DIET, Zotlang

3) Govt. Vengthlang Middle School

Veng Fai Lawmman:

1) Champhai Vengthlang North

2) Kahrawt Veng

3) Hmunhmeltha

Town Area (Census Town) pali zinga khua fai berah Biate thlan a ni bawk.

Vawiin hunah hian C. Lalengkima, SDS chuan Faina Hapta chhunga hmalakna leh hun hman dan report pe in, faina intihsiaka endik dan a sawifiah a. Hun hi Pi V. Lalmuanpuii, DUDO in lawmthu sawiin a khar a ni.