Vawiin ah khan Governor Lt.Gen(Rtd.) Nirbhay Sharma chuan Mizoram University hnuai a Department of Horticulture leh The Associated Chambers of Commerce of India(Assocham) tangkawp ten an buatsaih “ Linking Prospective Food entrepreneurs with Government Schemes & Markets” a hawng a.

He zirhona pawimawh tak hi Ministry of Food Processing Industries(MOFPI), Government of India leh Agricultural and Processed Food Products Export Development Authority (APEDA) te hmalakna a ni a. He hunah hian Buhl eh bal, Thlai leh thei dahthat leh hralh chhuah hmanga sumdawnna kalpui mek leh hmalak tum te tan Sawrkar tanpuina awm thei chungchang leh hralh chhuah dan hlawk zawk zirtira mithiam ten an pe a ni.

Assocham leh MZU conference buatsaih hawngtu, Governor Lt.Gen(Rtd.) Nirbhay Sharma chuan Central sawrkar in Hmarchhak bial tih hmasawnna atana hmalakna pawimawh tak pakhat food processing sector tihphuisui chungchang seminar chu hmarchhak bial chhung mi te tan a pawimawh hle a ni a ti a. India sawrkar laipui in Hmarchhak bial tihhmasawnna tura a rilru put dan a thlak hi thil lawm awm tak a ni a. Tunhma kum 1 leh a chanve liamta ah kha chuan hmarchhak bial hmasawna chungchang reng reng Delhi atang vekin ruahmanna rawn siam a ni thin a, tunah erawh chuan kha thil kha thlak ni tawh in hmarchhak tihhmasawna tur chuan hmarchhak bial luhchilh a nita a ni a ti. Look East Policy atangin Act East policy ah kan kai a. Act East Policy laimu hrim hrim te pawh hi hriatchian a ngai a, Act East a pawimawh ber chu hmarchhak bial leh an thenawm ram Bhutan, Nepal, Myanmar leh Bangladesh te an ni a ti a. Hmarchhak bial hi Act East policy hlawhtlin pui tur chuan tih hmasawn hmasak a ngai a. Inthlak thut hi chhiatna a ni thei a, chu mi a thlen loh nan chuan hmarchhak bial hi weakest link ni lovin strongest link ah India leh South East Asia ram te bakah India thenawm ram te nena inzawmna ah a siam theih a ni a ti. Tunah India Outpost anga ngaihtheih ni mahse hunrei lo te chhungin hmarchhang bial hi Asia chhim chhak leh Asia Pacific tuipui kam ram zawng te nena sumdawnna kawngpui a nih bakah sumdawnna hmun a la ni dawn a ni a ti. India in policy urhsun taka a kal pui mek hlawhtlin nan hian hmarchhak mite tumruhna leh inpekna a pawimawh hle dawn a ni a ti.

A sawizelna ah Mizoram ah hian hlawhtlinna atana pawimawh ber pakhat ‘remna leh muanna’ a awm a, chu thil chu midang te neih ve loh vanneihna bik, ram tih hmasawn chak bik na atan hman theih a ni a ti. State chhung mipui te ziak leh chhiar ah midang chunga leng an ni a, a ram sik leh sa a nuam in thlai chitin reng that theihna hmun a ni bawk si a, tumruhna nen tun aia rual el zawka hmalakna kalpui a nih phawt chuan Mizoram in hmasawnna lian leh thil nasa a tawng baw thei a ni a ti a. Mizoram in a hlawhtlin pui tur awlsam ber chu Horticulture a ni a, horticulture huang chhungah pawh organic farming a beisei awm leh zual ang a ti. Tunah chuan a phak tawk aia hniam rilru a pu emaw tih turin Mizoram a tang nasa tawk lo a ti a. Mizoram chuan inhnekna hungbial chhunga mahni bukrih zat hnuai lam hnek lovin, a bukrih zat in enchiangin rual el a zir a ngai a ni a ti. Mizo thalai beiseiawm tak tak te chu vak chhuak a thiltha Mizoram tan zirchhuak tur leh hnam hrang hrang tawng tun aia nasa zawk thiam tum turin a fuih a, rilru inhawng tak ngaihdan neih a tul a, mahse, hnam rothil hlu tak leh zo zemawi erawh hloh nan hman kher loh tur a ti.

Prospective Food Entrepreneurs pual conference ah hian Pu Ronald Sapa Tlau, MP(RS), Mizoram, Prof. R.Lalthantluanga,Vice Chancellor, MZU, Pu J.P.Meena, Addl.Secretary, MOFPI, GOI leh Prof. Amritesh Ch.Shukla, HOD, Dept of Horticulture, MZU ten thusawina hun an hmang a.

Mizoram chhungah thlai leh thei chi hrang hrang 75% that akin a chin theih tih Rajya sabha MP Pu Ronald Sapa Tlau chuan kalkhawm te hma ah a sawi a. Mizoram in a thlen tur a thlen lohna chhan ah hralhchhuahna fumfe awm loh vang bakah scheme tha tak hmangin kuthnathawktu te rim thluk an lo ni thin a, vanduai thlak takin, scheme tha tak kha a hlawhtlin hma in scheme tha dang bawkin a thlak leh thin a ti. Mizoram ah ram leh huan thlai thlakna zau tak enkawl an awm tam lova, Mizoram in a thar chhuah buh leh bal, thei leh thlai lei duhtu te erawh chuan Tons sing bi an duh thu an rawn thlen leh si a. He thil a harsatna chu Mizoram in a tharchhuah dahthatna tur chhekin lian tak a awm loh vang a ni a ti a. Food Processing Ministry in Mizoram chhung leh hmarchhak bial dangah te pawh internal market linkage roads a nawrchhuah theih phawt chuan he harsatna hi sutkian a ni ang a ti a. Tun dinhmun Mizoram tana chona leh hmachhawp awm chu thlai leh buh leh bal tam tham tak Mizoram dawr duhtu te duh khawp thar chhuah a ni a. He kan hmachhawp te hi tih hlawh tlin a nih theih nan central sawrkar atanga tanpuina awm thei te chak zawk haih chhuah a nih theihnan leh kuthnathawktu te pawn an ham thatna hrang hrang te an hriat chian leh zual nan state sawrkar leh kuthnathawktu enkawl biktu department hrang hrang te tan nasat a ngai a ni a ti. Hlawhtlinna atana pawimawh ber erawh tumruh, taihmak leh teirei peih a ni tih theihnghilh a thiang loving a ti.

Thusawitu dang, Prof. R.Lalthantluanga chuan Mizoram chhung ah thlai man man zawk leh man tam taka hralh thei chi a thar theih tih hriatna bawhzuiin hmalak mek an neih thu a sawi a. Heng thlai man tam te hi hlawhtling taka chin puitlin a nih chuan kuthnathawktu te zirtirna pek chhawn leh an ni ang a ti a. Food Processing testing and research centre pawh Mizoram ah din a remchan tur thu a tarlang bawk. Conference chhimtu te pawh an mimal hlawkna tur a nih piah lamah Mizoram tan a ni tih hre chunga an thil zir te bengkhawn turin a fuih bawk.

MOFPI Addl. Secretary Pu J.P. Meena chuan India in Food Processing ah nasa takin huang a zauh mek a, India loneitu ten an tharchhuah hlu tak, a dah that dan thiam loh vang leh dah thatna hmun awm loh vanga cheng vaibelchhe nuai dawn man luang ral thin hi tih tawp a tum a. Heng thlai thar luang ral nasa lutuk a awm thin laia ei leh in tha hmuh loh vanga naupang leh nu vaibelchhe tel an awm hi thil vanduai thlak tak a ni a. Central sawrkar chuan food processing sector la naupang tak hi a naupanna en lovin nasa taka hma la tur in a tur mek a, chu chuan hmarchhak bial pawh a rawn tuam mek a, nasa zawka hmalak belh sauh sauh tum a la ni a ti. Food processing sector hnuaia sumdawn duhtu te tan Central sawrkar ah tanpuina liantham tak tak tam tak a awm teuhva, heng te hi sumdawn duhtu te leh kuthnathawk ten an la hmel hriat loh avangin mipui tam tak la zirtir zel turin assocham, CII leh midang te sawrkar laipui in a chhawr mek a ni a ti. Mizoram ah chauh ni lo, India state dangah pawh thlai thar chhuah a hmasawnna hi thlai dahthat lam hawia hmasawnna in a pha meuh rih lova hmabak a hau tak hle a ni a ti a. Mizoram bik ah pawh mega food park project an kal pui zinga pakhat din a ni dawn chu thil hlawh tlinna turin Mizoram ah thahnem ngai mi tam zawk an awm a ngai a ni a ti.

Conference hun then hnih na hi Dr.Lalzarliana, Director, Agriculture department in a kaihruai a. He hunah hian Pi Sunita rai, AGM, APEDA, Pu Rosanglura ralte, HO, Horticulture department, Pu Amitabh dutta, AGM, SBI, Pu Lalngilneia, Sr.Manager, MRB leh Pu John Saikhuma, GM,MSME ten kalkhawmte an zirtir a ni.