Chief Minister Pu Lal Thanhawla chuan vawiin khan Volunteers for Community Mental Health (VOLCOMH) leh Department of Health & Family Welfare tangkawpin Lal Thanhawla Auditoriuma an buatsaih, ‘World Mental Health Day Vawi 23-na’ a hmanpui a. Thupuiah ‘Dignity in Mental Health’, (‘Rilru Hrisel chu Zahawmna’) tih thlan a ni.

Chief Minister chuan rilru hrisel, mental health hi kan ngaihpawimawh a tul hle a ni tiin, hmasawnna leh intodelhna kawnga hnarkaitu pawimawh tak a ni a ti a. Rilru lama harsatna neite hi Pathianin a duh taka a siamte an ni a, angkhata kan inen tlan a, a enkawlna lamah pawh zahawm taka kan kalpui a tul a ni a ti a. Ringtu kan nih angin tanpui ngaite tanpui a, samari mi tha nih kan tum tur a ni a ti.

Chief Minister chuan ram changkangah chuan mental health hi an ngaipawih hle a ni tiin, keini ram thanglaite chu sum lama harsatna nei kan nih avangin duh angin kan kal theilo a ni a ti a. Khawvel ram zawng zawnga 33% te chu rilru hrisello te enkawlna tur budget neilo an ni a ti a. Rilru harsatna nei te hi mithiamte chhut danin kum 14 an tlin hmaa harsatna lo intan tawh a ni a ti a. Mizoramah enkawl ngaite enkawlna kawngah hma kan sawn ve hret hret a ni a ti. Chief Minister chuan kuttlingloa sum lak duhna te, duhamnate, mahni thawhchhuah piah lama khawsakte hi rilru hrisel loh vang a ni tiin, rilru hrisel nei tur chuan ei leh inah fimkhur a, zuk leh hmuamahte kan fihlim a tul a ni a ti a. VOLCOMH inpekna leh hnathawhte chu ropui a tih thu a sawi bawk a ni.

VOCOMH President Dr. Zoengpari chuan rilru hrisel chu engkima lungawi thei, engpawh lo thleng se huaisen tak leh chhel taka hmachhawn theih an ni a ti a. Rilru hrisello hi rilru buai leh harsatna neite a kawklo a, rilru hrisello chu mi huatna neih leh er te, midang leh vantlang thil tiha lungawilo, sawisel chingte hi an nih thu a sawi bawk a ni.

World Mental Day hi 10 October a hman thin a ni a, amaherawhchu VOLCOMH ina a bitum, NGO leh zirlai naupangte naktuk ni 10 October a an kal that theih a beiseiawm loh avangin vawiin hian an hmang ta a ni. World Mental Health Day hi kum 1992 ah hman tan a ni a, Mizoramah chuan kum 1993 atang khan VOLCOMH bultumin kumtin hman thin a ni.