Khawpui chhunga faina beihpui hmalakna Swachh Bharat Mission chu vawiin khan Champhai-ah UD&PA Department chuan tlangzarhna hun Govt. Champhai College Auditorium-ah a hmang. He hunah hian Champhai DC Pu H. Lalengmawia chu khuallian a ni.
Khuallian chuan vawiin Swachh Bharat Mission tlangzarh a nih rual hian lang thei thianghlimna mai bakah chhunglam thianghlimna keng tel se a tih thu a sawi a. He Mission hnuaiah hian mipui leh khawtlang thianghlim nana hmanrua chhawpchhuah bakah zirtirna pek a nih tur thu sawiin, kan zavai thianghlimna chu kan zavai changkanna a ni tih hria a ke kan pen a tul a ni, a ti.
DC Pu H. Lalengmawia chuan UD&PA Champhai in hma a lakna chu fakawm a tih thu a tarlang a. Tunlai khawvelah chuan sorkar policy hi a hming a kalpui ve satliah a, mipui tana hlawkna awm chuang silo a thawh theih a nih na chen a awm a. Chutiang nilova thahnem ngai taka khawtlang thianghlimna atan an thawh avangin Champhai DUDO Office chu thawk tha a tih thu a sawi a. Hna thawhna ah hian mi fak hlawh tum vang leh hming that tum vanga hmalak ai chuan rah tha tak tak chhuah tuma sawiselna karah pawh thawk zel turin vawiin programme a official kalte pawh Khuallian chuan a chah a ni.
District Urban Development Officer Pi V.Lalmuanpuii chuan programme sawihawnna hun hmangin, Pu Lalengkima, SDS chuan SBM chungchang leh Champhai District-a hma an lo lak tawhna hrang hrang te leh Town Area VC leh YMA te nen an inrawn thin na te a tarlang a. Pu Lalnunmawia, Govt. Champhai College Principal chuan lawmthu sawiin hun a khar a ni.
Vawiin hian Champhai District Swachh Bharat Mission Ambassador atana thlan -Triau Track, Feli Fanai leh Thangromawia te bakah Sanitation Volunteer atana ruat Champhai District Bharat Scouts & Guides te chu mipui hmaa puanzar an ni a. Banner Competition leh Slogan Competition siam ni bawkin, Banner insiamsiak a ti tha Lawmman Pakhatna dawngtu Pu Lalthamawia Bawlchhim leh lawmman pahnihna dawngtu Dr. Lalramdintluanga te hnenah DC chuan lawmman a sem a. Addl. SP Pu V.L. Lura Hauzel chuan Slogan phuah in tihsiaka tihtha zualte hnenah lawmpuina a hlan bawk. Vawiin hian SBM Ambassador-te bakah Presbyterian English School Scouts & Guides leh Genesaret Cub Pack ten thiam thil an entir a ni.
UD&PA hnuaia Swachh Bharat Mission launching programme hi Champhai bakah hian khaw dang pathum - Biate, Khawhai leh Khawzawl ah te neih leh a ni ang a. UD&PA chuan SBM launching denchhen hian hnatlang pui leh Quiz intihsiakna a la buatsaih dawn bawk.
Vawiin Slogan intihsiakna a thlan te chu:
1) Lalremruata, Electric Veng, "Thu tam tak sawi lo in faina leh thianghlimna hmangin changkanna lan tir rawh",
2) PC Laltanpuia, Bethel Veng, "Ak la, phiatfai la, chharkhawm rawh" leh
3) PB Vanlalhriata, Khawzawl Zaingen, "A thenawm hnena faina kawng kawhhmuhtu chuan hriselna leh damreina thil pek duhawm a hlan a ni."
