Pu Lal Thanzara, Health Minister chuan vawiin khan Ruihhlo ngai ten tisa leh thlarauva Pathian chhanchhuahna an chan theihna tura Central YMA leh Mizoram Synod Revival Committee ten an buatsaih, Chhanchhuahna Camping, Beraw tlanga August ni 4 atanga neih tan chu tlawhin Camper te tan a thlawnin Free Medical Check-up a neih sak bawk.
He Chhanchhuahna Camping Free Medical Check-up hi tan a nih hmain hunserh tawi hman a ni a. He hun hi Working Committee Chairman Pu Vanlalrema Rokhum, Vice President CYMA ni bawkin a kaihruai a. Pu Lal Thanzara chuan camper te chu tisa leh thlarauvah hlawhtlinna duhawm tak nei tura a duhsak thu sawiin dawhtheihna tak leh thuawih taka hun hmang turin a fuih bawk. Minister hian Organising Committee te pawh mamawh an neihna zawnah theih tawpa tanpui a inhuam reng thu a sawi bawk. Organising Committee te hian camping mamawh tul zual, Camper damdawi leh thil dang dangte Pu Lal Thanzara hnenah an lo thlen a, chungte chu Pu Lal Thanzara hian a tihfel sak nghal bawk a ni.
Free Medical Check-up ah hian Health Minister ruahmanna angin Aizawl Civil Hospital atangin Doctor pasarih (7) Nurse pakhat (1) leh Internship tilai mek doctor ten damlo leh insawiselna nei te an en fiah a ni.
He Chhanchhuahna Camping-ah hian tun dinhmunah camper 294 vel an awm a. Hmeichhia hi 39 an awm mek a ni. Tun tum Chhanchhuahna Camping-ah hian Thupui atan "Sim Rawh U" tih hman a ni a. Speaker atan Lalsanglura Ralte, "Sons Of God" (Synod Revival Team) rawih an ni.
Central YMA committee sang, CEC thurel angin He Camping-ah hian Aizawl khawpui chhung YMA Branch hrang hrang atangin Duty tur inchhawka ruahman a nih bakah mimal thahnemngai te pawhin he hunah hian theihtawp an chhuah bawk a ni.
He Chhanchhuahna Camping hian August ni 24 thleng a awh dawn a ni.
