Vawiin khan Champhai DC Conference Hall ah Champhai District chhunga Electoral Registration Officer, Assistant Electoral Registration Officer leh District Election Office lama thawktu Officer te tan SVEEP Special Drive Training chu District Election Officer Pu Vanlalngaihsaka IAS hovin neih a ni.  

Pu Vanlalngaihsaka chuan, electoral roll leh election thil chu thil thar awm reng thin leh inzir zel ngai hna a nih thu sawiin thiam sa emaw thiam vek anga inngaih tur a niloa intuaihriam reng a ngaih thu a sawi bawk. Kumina Election Commission lamin kum 18-21 inkar Special Drive a buatsaih hi thil kalpui zen zen loh a nih avangin uluk taka inzir a ngaih thu sawiin he Drive hi hlawhtling taka kalpui a nih theih nan a mawhphurtu officer te an pawimawh thu a tarlang a ni. Pu Vanlalngaihsaka chuan, mipui thlan roreltuten ro an relna rama awm kan nih angin he Drive in a tum ber chu roll a chuang tur chi khua leh tui zawng zawng, eng mi pawh roll a thun a, a huna vote thlak ngei tura buatsaih a ni, a ti bawk. 

Training hi Pi Rebecca Laldinmawii Hrahsel, MCS District Level Master Trainer in a pe a. Training ah hian District Election Officer (DEO), Election Officer (EO), Electoral Roll Officer (ERO) leh Assistant Electoral Roll Officer (AERO) ten online (internet) hmanga Election kaihhnawiha thil hriattur chi hrang hrang inhrilhhriatna hun hman a ni a, mipuite tana Electoral Roll a hming inziahluh, hming thlak, vote neihna insawn leh Election kaihhnawiha thil chi hrang hrang a lo awlsam zawk nana Internet kaltlanga kalhmang inzirtirna hun hman ani bawk. Hemi bakah hian Election kaihhnawiha Form chi hrang Form 6, Form 6A, Form 7, Form 8 leh Form 8A chungchang inhrilh tharna hun hman a ni bawk a ni.

Special Drive hi 1 July – 31 July, 2017 chhunga polling station zawng zawnga neih tura kalpui mek a ni a. He Drive in a tum ber chu khua leh tui kum 18-21 inkar Roll a la chuang lo zawng zawng zawnchhuah leh thunluh a ni. Hetih rual hian siamthat, paih, insawn ang chi (continuous updation) pawh kalpui reng tho tur a ni.