North East Rural Livelihood Project (NERLP) bultuma  thlai thar dah thatna tura sak  Collection Center pahnih, Rulchawm leh Ruallung khua ami  chu vawiin khan Rural Development Minister leh bialtu MLA ni bawk  Pu R.Lalzirliana’n BNRGSK Hall, Rulchawm-ah a hawng. 

Rural Development Minister chuan a bial chhung khaw pahnihah thlai thar hralh tur leh leite dahna tur Collection  Center pahnih hawn ani chu lawmawm a tiin, hemi awmtheihna atana NERLP hnathawktute hmalakna chu a fakawm hle ani, a ti a. A chhawrtu chu mipuite an nih angin a enkawlzui zel na turah pawh neitu thinlung pua enkawla vawnghim turin a chah a. Kalkhawm mipuite chu an hnathawhna reng rengah  bul tana duhtawk mai lovin theihtawp chhuaha atawp thlenga tan la thin turin a fuih a. Pu R. Lalzirliana chuan Mizo Tlawmngaihna tla hniam zel chu a vei thu sawiin, hlawh nei lo chuan hnathawh kan tum thin lo a, hemi kawngah hian mimal tinte kan in enfiah a ngai ani, a ti a. RD Minister chuan a bial chhunga hmasawnna te a tarlanga , Khanpui atanga Tualbung panna kawng chu cheng vaibelchhe 20 senga siam tura pawmfel  tawh ani a ti a. Minister chuan  khawvel sik leh sa inthlak zel tur venna atan thingphun uar sauh sauh turin  kalkhawmte chu a chah nghal bawk a ni.

Pu Reuben Ranglong  District Project Manager, District Project Management Unit, Aizawl (NERLP)  pawhin thu sawiin NERLP tum ber chu thingtlang hmasawnna atana hnathawh, chhungkaw tinte ei leh bara hmasawnna siam leh thalai hna neilo te a thlawna training pek te anih thu a sawia. Mizoram chu District pahnih Aizawl leh Lunglei hnuaiah thenin thingtlang mite chawikanna atan nasa takin hna an thawh mek ani a ti. 

NERLP hi Ministry of DONER hnuaia mi a ni a. World Bank puihna in thingtlang hnathawk,  a bik takin tlangram lo neitute chawikanna  Project a ni a.  Project hnuaiah hian North East huamchhung chu phase hrang hranga tuam tum ani a, Mizoram bik hi Central leh Eastern zone hnuaia awm a ni. Collection Center pahnihte hi June Ni 16, 2016 a sak tan niin November Ni 26, 2016 khan sak zawh a ni a. Rulchawm Collection Center hi cheng nuai 12.19 senga sak ani a, Ruallung Collection Center hi cheng nuai 12.32 senga sak a ni.

Collection Center hawnna programme hi Pu Lalchhandama VCP, Rulchawm-in a kaihruai a. Pu R. Lalramsiama, Secretary, Ruallung Community Development Group leh Pu Smith Lalruatfela, Secretary, Rulchawm Community Development Group te hnen atangin report ngaihthlakna neih a ni a. Pi C. Lalrawngbawli, Block Project Coordinator, Thingsulthliah Block (NERLP) in lawmthu sawina neiin he hun hi khar a ni.