Vawiin hian Serchhip Bawrhsap pisaah Serchhip District Steering Committee on Intensified Diarrhoea Control Forthnight (IDCF) te chu an Chairman Pi Sangchhin Chinzah, DC hovin an thukhawm a. Karleh 12^th June, 2017 atanga hapta hnih chhung naupang kawthalo beihpui thlak huna hmalak dan tur an rel. 

Chairman Pi Sangchhin Chinzah chuan, India ram huapin naupang kum 5 hnuai lam kawthalo vanga nunna chan kum tin mi nuai hnih vel an la awm thin a, Serchhip District bikah chuan naupang kawthalo natna tuar chu nei thin mahila nunna chan phah han sawi tur kum kalta chhung khan an awm lo nia hriat a ni. Kan District bik thlir chuan faina leh thianghlimna kawngah nasa takin hma kan sawn a ni tih a hriat a, chutih laiin he natna lak atanga kan fate an fihlim deuh deuh theih nan theihtawpa kan beih sauh sauh a ngai a, inthlahdah thei kan nilo a ni, a ti. Mipuite chu, kawthalo natna laka kan fihlim a, hrisel taka kan awm theih nan faina leh thianghlimna ngai pawimawh a, tui thianghlim chauh in reng tur te, kut fai taka vawng reng tur leh ei tur thianghlim chauh ei thin turin a chah a ni. 

Vawiina meeting hian Beihpui Thlak hawnna atan Chhiahtlang khua chu a thlang a, 12^th June, 2017 zing dar 10 ah a hawnna ni Chhiahtlanga, khawtlang hruaitu, nu leh pa  leh naupangte nen buatsaih a ni ang. He Beihpui thlak chhung, hapta hnih chhung a District chhung khaw tina hmalak dan turte, District chhung School zawng zawnga inzirtirna neih dan tur te,  ASHA worker, Health Worker te, Anganwadi Worker leh thawktu hrang hrangte training neihpui dan turte, Department dangte nena thawh ho theihna lai tur leh thawhho dan turte, leh National Health Missions lam atanga hmalak dan tur hrang hrang ruahmanna lokal anga hmalak dan turte an rel a ni. 

Hengte bakah hian Kawthalo natna laka fihlim dan tur inzirtirna chi hrang hrang, electronics media hmanga thehdarh dan tur pawh Information and Public Relations Department Office, nena tangkawpa hmalak dan tur ruahmanna pawh siam a ni bawk. 

He meeting-ah hian Dr. Laldawngliana Sailo, Chief Medical Officer, Dr. ZD Lalmuanawma, Medical Superintendent, District Hospital leh District Steering Committee member dangte an tel a ni.