Vawiin chawhma khan I&PR Auditorium-ah National Students' Union of India(NSUI) bultum in HSLC leh HSSLC result chhuak ta a pakhatna hauh tute chawimawina buatsaih a ni a. He chawimawina hun hi School Education Minister Pu H.Rohluna chuan khuallian niin a hmanpui a ni. 

School Education Minister Pu H.Rohluna chuan zirlai tithazual te, an chhungte leh an zirtirtu te lawmpuina thu sawiin Mizo mipui ten an enbik chhunzawm tur thu a tarlang a. Zirlai dang te pawhin an thiante hlawhtlinna chu chona leh phurna atan an hman ngei a beisei tih a sawi a. School Education Minister chuan  Mizo te chu tlemte mah ni ila -  'theihna sang tak nei  leh mi tam zawk te thlenchin thleng ve thei kan ni a. I-League ah kan theihna India in a hmu tawha, zirna khawvel a inelna sang ber berah kan theihna te hi kan lan chhohtir zel a ngai dawn a. Kan zirlaibu te hi All India Standard a ni a, India ramah a aia changkang zawk a awm lova. Chuvangin,  Mizo mipui ten All India Services topper kan neih  hun hi beiseina nen kan thlir mek a ni', a ti.  Zirlai zinga an theihna za a za sual chhuah tum ten midang aia hlawhtlinna an hmuh bik thin thu a sawi a. Midang in pen khat a pen chuan pen hnih, mel khat a kal chuan mel hnih kal theih tumna rilru nei chunga an hmalam hun hmachhawn turin zirlaite chu a chah a. Khawvel hmasawn zel in  a ken tel pakhat chu hunkhawhralna hmanrua chi hrang hrang  - social media(Facebook, Whatsapp, Instagram, etc,.), electronic device hrang hrang, Games leh thildangte  a ni a. Chutiang hun khawhralna thil tangkai silo laka insum thei apiang tan chauh dinchhuahna a awm tawh a ni a ti a.  Internet leh computer te pawh a tellova khawsak hleih theihloh ni mahse  zirna kaihnawih atan chiah zirlaite chuan an hman a tul a ni a ti. 

NSUI in zirlai chawimawina a hlan te chu HSLC Topper Laldintluanga, Marian High School, Serchhip, HSSLC(Arts) Topper Lalrinzuali, Home Mission School, HSSLC(Science) Topper Zomuansangi, St.Pauls HSS leh HSSLC(Commerce) Topper Joseph Vanlalrema, Oikos HSS te an ni a. An zavai hian NSUI chuan lawmpuina thuziak leh laptop computer a pe vek a ni. Zirlai titha te lawmpuina hunah hian NSUI atangin Pu Lalhmachhuana, President bakah Zirlai titha te hian thusawina hun an hmang a ni.