Vawiin chawhma dar 10:00 khan St Joseph’s Higher Secondary School chuan Celebration Programme leh Annual Sports Closing Function 2017 chu Vanapa Hall-ah an hmang a. Mizoram Governor Lt. Gen. Nirbhay Sharma, PVSM, UYSM, AVSM, VSM, (Retd) chuan he programme hi khuallian niin a hmanpui. 

Mizoram Governor chuan St Joseph’s Higher Secondary School an hlawhtlinnaah a lawmpui takzet thu sawiin, Celebration Programme-ah zirna kawnga hlawhtling te chaiwmawi an nih ang bawkin extra-curricular activities lama ti tha te chawimawi an nih chu lawmawm a ti a. Rilru hrisel nei tur chuan taksa pawh a hrisel a tul a ni tiin, zirlaite leh zirtirtu kalkhawmte chu zirna mai bakah infiamna leh intihhlimna hrang hrang ngai pawimawh zel turin a chah a. Zirlaite chu an nu leh pa te dawt ah chuan an zirtirtute an chawimawi a tul a ni a ti a, zirlaite tana an inpekna leh thawhrimna theihnghilh lo turin a hrilh bawk. Mizoram chu ziak leh chhiar thiam (literacy rate) awm tamna state ni chunga eizawnna ngelnghet neilo (unemployed) mi tam tak an awm chu vei awm a tih thu kalkhawmte a hrilh a, kumin UPSC Civil Services Examination-ah Mizoram atanga tling an awmlo chu pawi a tih thu a sawi a, heng exama tling thei turin zirlaite chu tum mumal tak leh hmathlir nei rana lehkha zir zel turin a fuih a. Mizo thalaite chu thiamna leh theihna tam tak an nei a, hun awm zel tura hmasawnna an neih theihna atan Mizoram chhuahsan a, Mizo tawng bakah tawng dang Hindi leh English te an zir a tul a ni, a ti. HIV leh Cancer-te a hluar avangin nunphung leh thil chin thalo - zu, drugs, leh vaihlo leh a kaihnawih zuk leh hmuam te an hawisan ngam a ngai a ni, a ti a. Mizoram Governor chuan Healthy Mizoram Campaign-ah mizo thalaite thahnemngai taka tel turin a sawm nghal bawk a ni. 

Lt. Gen. Nirbhay Sharma, PVSM, UYSM, AVSM, VSM, (Retd) hian zirlai leh zirtirtu tithate lawmman leh Certificate a hlan bawk a ni. 

St Joseph’s Higher Secondary School Celebration Programme-ah hian Pu Ngunlianchunga, Minister of State chu khualzahawm a ni a. Pu H. Lalengmawia, IAS, Pu RK Lianzuala, Managing Director, Zonet leh Pu H Rotluanga, Founder Zephyr Drama Club-te Special Invitees niin thu tawi an sawi bawk a ni.  

St Joseph’s Higher Secondary School Celebration Programme hi kumin HSLC leh HSSLC result an neih that lawmna te, Inter Higher Secondary School Basketball 2016 leh 2017 Champion an nih na leh 2016 Independence Day Parade-a School Contingent zinga 1^st Prize an dawn te lawmna hun a ni. 

2016-2017 hun chhunga  St Joseph’s Higher Secondary School in an hlawhtlinna an tarlan langsar zualte chu - 2016 Independence Day Parade-a School Contingent zinga 1^st Prize, , Inter Higher Secondary School Basketball 2016 leh 2017  Champion, Class XII Result 2017-ah 2^nd, 4^th, 7^th, 8^th leh 9^th ranks in Commerce Top 10, Home Science, Business Studies leh Hindi subject ah te mark hmu sang ber te an ni. Class XII (Arts) ah 99.13%, Class XII (Commerce) ah 95.35%, Class XII (Science) ah 98.4% leh Class X ah 98.8% pass percentage an nei bawk a ni.