Vawiin khan Taxation Department, Government of Mizoram leh Commissionerate of Central Excise and Service Tax, Shillong  tangkawpin an buatsaih Goods and Services Tax Awareness campaign  Chanmari YMA Hall-ah neih a ni a. He hunah hian Taxation Minister Pu Lalsawta chu Khuallian a ni. 

Pu Lalsawta chuan GST chu India ramah July ni 1 ah hman tan anih dawn avangin hun tlemte la awmah hian sumdawngte leh chhiah petute’n an  hriatchian zawk nan uar taka awareness campaign neih a pawimawh thu a sawi a.  GST harsatna awmlova kalpui anih theih nan theihtawpin training pawh Taxation Department ah chuan neih ani tawh, a ti a. Internet that tawk loh avangin duh anga chaka migration kalpui a harsat thu Minister chuan sawiin July ni 1 atanga Mizoram ah hman tan anih ngei theih nan theihtawp an chhuah thu a sawi bawk a ni. 

Taxation Minister chuan ama hunlaia India ram Taxation history-a bung thar pawimawh tak kai ani tur chu lawmawm a tih thu sawiin GST hman anih hunah chuan chhiah pawh tlema a hniam zawk a beisei thu leh chhiah chawi nawn (double taxation) te a awm tawh loh tur thu a sawi a. Hei hi India ram mipuite leh sumdawnna in a hlawkpui ngei a rin thu a sawi bawk a. Sumdawngte leh chhiah petu lo kalkhawmte chu zawhna te zawta hlawkpui taka Awareness Campaign chu hmang turin Pu Lalsawta chuan a chah nghal a ni. 

Goods and Sevices Tax Awareness Campaign-ah hian chawhnu lamah Technical Session neih nghal niin Pu Lalhmingmawia Ralte, IRS, Deputy Commissioner, Central Excise and Service Tax, Shillong, chuan chipchiar takin GST-a Enrolment, Registration leh Migration tihdan te a sawifiah a. “Returns on GST” leh “Transitional Provision”  tih thupui hmanga presentation pe bawkin kum khata cheng nuai 10 leh a chunglam bungrua emaw,  tha(service) lei chhuak te leh Mizoram pawn atanga bungrua la luttute chu GST hnuai an in register a, Permanent Account Number(PAN) an neih vek a ngaih thu a sawi a. GST hnuaiah online veka tih anih tawh dawn avangin sumdawngte’n an accounts bu felfai taka an vawn a ngai tawh dawn a ni, a ti. 

He hunah hian Taxation Department Secretary Pu Vanlal Chhuanga chuan kalkhawmte lawmna thu a sawi a. Mipuite lam atanga zawhna leh chhanna hun hman nghal a ni. Awareness Campaign-ah hian Pu L.H Rosanga Commissioner of Taxes, Taxation Department leh Pu L.Beimopha IRS, Jt. Commissioner of Central Excise and Service Tax, Shillong  pawh an tel a ni. 

Goods and Services Tax Awareness Campaign hi North Zone leh Central Zone ah te  neih tawh bawk a ni.