Vawiin chawhma khan Horticulture Minister Pu PC Lalthanliana chuan Horticulture Lunglei Division atangin New Economic Development Policy (NEDP) hnuaia off-season cabbage (zikhlum) chin thlang tute hnenah zikhlum tiak Lunglei Horticulture Divisional Office-ah a sem. 

He programme hi Lunglei DHO Pu Vanlalnuntluanga Renthlei chuan a kaihruai a. Pu PC Lalthanliana chuan off-season cabbage chin chu NEDP hnuaia programme pakhat a nih thu a sawi a. He flagship programme, NEDP-in a tum ber chu tanpui tlakte tanpui a ni tiin, off-season cabbage ching tura thlanchhuahte chu mi rinawm, taima leh intodelh tum an nih a rin thu a sawi a ni. Theihtawp chhuah tur leh a ti leh zel turte tana mi entawntlak ni turin a chah nghal a ni. 

NEDP hnuaia off-season cabbage ching tur hian Lunglei Horticulture Division atangin chhungkaw 22 – Pukpui atangin chhungkaw 10, Zohnuai atangin chhungkaw 8 leh Hairep atangin chhungkaw 4 te thlan chhuah an ni a. Chhungkaw pakhat hnenah zikhlum tiak 1100 theuh pek an ni a, a chin dan training pawh pek tawh an ni. 

He thlai chinna atan hian ram Tin 1-ah cheng 95,000 man hu a chi, damdawi leh terrace laihna pek tura ruahman a ni a. A hralhna lama harsatna a awm loh nan tum khata thar huk lovin a tiak pawh karhnih dan velah a tahtawla pek tura ruahman a ni.