Khawvel hmundang rualin vawiin khan Champhai Bawrhsap hovin World Environment Day, 2015 chu Champhai DFO Office-ah Department hrang hrang hotute leh Tlawmngai pawl leh media mite nen hman a ni a. Hun hi Pu Vanlalchuailova, DFO Champhai chuan kaihruaiin, Pu PC Laltanpuia, ACF chuan sawihawnna hun a hmang a. Thusawi leh zawhna leh chhanna hunin chhunzawmin, District chhunga environment humhim kawnga hmalak theih dan tur te rel nghal a ni.
DC Pu H. Lalengmawia chuan hma hun lam thlir nachang hre leklo a ramngaw leh nungcha kan lo tih chereu thin avangin tunah hian tui leh sik leh sa inthlakah harsatna kan tawk tan chho mek a; hemi kawnga thangharh tawhte hian a la hrethiam velo te hnenah hian kan hrilhhriat a ngai a ni, a ti a. Thusawi mai duhtawk lovin kan awmna hmunah theuh mimal tinin tih theih kan neihte hi kan tih chuan a tirah awmze neilo angin lang mahse, beih fan fan chuan khuareiah a rah tha chu hmuh tur a la awm ang tiin, kalkhawmte chu thing leh mau phun uar leh humhalh kawngah tan la turin a sawm a.
Sorkar Flagship Programme NLUP chuan a mamawhte tan eizawnna pek satliah mai chu a thil tum a nihloh thu leh, kan environment tana thalo em em tlangram loneih tihrem a eizawnna kawngdang dap sak chu he policy hian a ngai pawimawh thu hi Line Department-ten an beneficiary-te hnenah fiah taka an hrilh thin a tul a tih thu Champhai DC chuan a sawi bawk.
Vawiin programme kaihruaitu Pu Vanlalchuailova, DFO chuan mipui rilru ah neitu nihna kan put hi a hun tawh tak zet thu sawiin, ramngaw leh nungchate humhalh hi mihring nunphung pangngai humhalhna a ni tel tih kan hriat a ngai a ni, a ti a. Duhamna avangin mamawh bak aia tam thing kit a hralh an awm teuh thin avangin mipuiin kan tuar tlang vek a; dan bawhchhiate hremna chungchangah hian tihsual leh tur venna khawp hremna pe lova inhriatthiamna nena inchhuah hi sawi tur a tam in, environment kan la ngaih pawimawhlohzia a tilang a ni, a ti a. Nungchate hian Chanchintha dawng tawh hnam kan nih hi an hriat ve a ngai a ni, a ti.
Pu PC. Laltanpuia, ACF chuan World Environment Day lo chhuah dan leh hman a nih thin dan tlangpui a sawi a. Kumin atan hian he ni denchhen a thupui thlan chu “Seven Billion Dreams. One Planet. Consume with Care” tih a ni. Kumina zirchiannah chuan khawvel huapa khawpui bawlhhlawh ber 10 zingah India khawpui 6 lai a lan thu tarlangin, environment kan tih hian ramri a neih siloh avangin mitinin kan khawvel hi humhalh turin tan kan lak a ngai a ni, a ti a ni.
Vawiin World Environment Day lawmnaah hian kalkhawmten District chhunga hmalak tlan theih dan tur an sawiho a. Champhaiah khawchhungah meuh pawh silai pu a kal an la awm chuan dan kan la hriat chianloh zia a la tilang a ni tiin, naupang ber atanga inzirtir kan mamawh thu te, hei kawnga zirtirtute mawhphurhna te; thingphun tawh sa enkawl zui chungchang leh dan lova thing kihthluk tihrem dan te, kawngdung bul ram huan a siamlo tura inhrilhhriat chungchangte sawi tel a ni.
