Sum leh pai um lova School din hi kan ram mamawh a ni tih Pu Joseph Lalhimpuia, Parliamentary Secretary School Education chuan a ti. Hemi thu hi vawiina Greenhill Public School Aizawl Mualpuia hawn thar Pathian hnena hlanna inkhawma a sawi a ni.

Pu Joseph Lalhimpuia chuan Greenhill Public school Pathian hnena hlan a lo  ni ta leh mithiam chhuanawm tak nupain an din chu school chhia anih a rin loh thu a sawi a. Mi tam takin Hostel an din a, chu chu naupang tam tak zir bul tanna a ni a. Amaherawhchu Hostel rules mumal kan lo la nei hauh lo mai a, tunah hian kan buaipui mek a ni a ti a. Sorkar-in Kohhran kut atanga School a lak hnuah subject wise teacher kan lo la nei ngai lova,  chumi avang chuan hmun hrang hrangah subject har deuh zirtirtu an neih loh thu an aupui thin a, hei hi zirtirtu lakna atana Subjcet wise teacher tur recruitment rules kan neih loh vang a ni a ti a. Chu rules chu tunah hian buaipui mek anih thu a sawi bawk.

Zirna kawngah quality aiin quantity-ah kan kal nasa nia a hriat thu sawiin Pu Joseph Lalhimpuia chuan kan ram tana a that zawk beiseiin Primary School thenkhat chu sawikhawm an ni tih a sawi a, tunah chuan khawtlang hruaitute leh ram hruaitute rilruah pawh school tha mang lo neih duah ai chuan school tha pakhat neih duhna a awm tawh a ni a ti. Zirtirtute chu an kutah naupangte an awm tih hriaa tan la sauh sauh turin a fuih bawk.

Greenhill Public School hi Rev Dr K.Thanzauva leh Dr R.L.Hnuni ten Aizawl Mualpuia an din a ni a, zirlai Kg I, Kg II leh class I te hawngin bul an tan a. Zirtirtu 5 leh anmahni puitu 2 an awm bawk. School dintu Rev Dr K.Thanzauva chuan an school  thil tum ber  chu naupangte thiltihtheihna hai chhuak a, thiamna hmantlak, mahni inrin ngamna, ram leh hnam hmangaihna, mahni mawhphurhna ngaihpawimawhna leh taimakna a nih thu a sawi. Greenhill Public School Pathian hnena hlannaah hian School Education Deptt. a Additional Secretary Pu Lalzirmawia Chhangte, SCERT Director Pi Malsawmthangi te, Joint Director Pi Laldawngliani Chawngthu te, zirlai nu leh pa leh rawngbawlna lama mi thiam engemawzat an tel a ni.