Nimin khan Parliamentary Secretary Pu Hmingdailova Khiangte hovin Kolasib DC Conference Hall-ah Kolasib a Sawrkar Pisa hrang hranga hotu ten Tuirial MLA bial chhunga Model Village atana thlan Thingdawl a he ruahmanna kalpui dan tur chungchanga meeting neiin hmalak dan tur  an sawiho.

Pu Hmingdailova Khiangte chuan Model Village hi duhsakna luanluhna hmun tur a ni lova, ruahmanna felfai leh rintlak, hmalakna mumal leh tha, langtlang taka thawhhona hmun anih dawn avangin khaw dang leh mipuite tan entawn tlak (model) a ni tur a ni, a ti a. A bial a Model Village a puan tawh Thingdawl chuan kawng tinrengah hmasawnna kawng a zawh dawn a, chuvangin a khaw mipuite leh Department hrang hranga thawktute inkara thawhhona tha neih a tul dawn a ni, a ti. Model Village hi hmasawnna hmel lanna tur anih dawn avangin hemi a mawhphurna leh chanvo neite chu theitawp chhuaha thawk turin a chah a ni.

Pi Maria CT Zuali, Director SIRD in Model Village chungchang leh a kaihhnawih thil pawimawh te a tarlang a. Hemi hnu hian Department hrang hrang aiawhten an Department Scheme kalpui mek Model Village atana seng luh theih ang chi chungchangte an sawi a ni.

Saansad Adarsh Gram Yojana (SAGY) Model Village tia hriat hi thingtlang khua te’n hmasawnna kawng chak zawk leh fuankim zawka an zawh theih nan Sawrkar Laipuiin a duan a ni a, he Scheme kengkawhtu chu Sawrkar Laipui, Ministry of Rural Development a ni. MP leh State tinah MLA te chu an Bial huamchhung ah Model Village-a siam tur khua thlang theuh tura tih an ni a. Kolasib District chhungah pawh Model Village tur hi thlan fel an ni tawh a. Turial MLA Bial ah Thingdawl, Kolasib MLA Bial ah Meidum leh Serlui MLA Bial ah Saiphai te chu Model Village atan thlan an ni.

He meeting ah hian Kolasib DC Pu Jitender Yadav leh a thawhpui te bakah Project Director DRDA, Director SIRD, DMO, DHO, DVO, DAO, DO (Soil), DEO, DFO leh PWD, PHE, P&E leh MI EE-te an tel a ni.