Vawiin khan Champhai District Anti-Tobacco Squad buatsaihin I&PR Auditorium-ah World No Tobacco Day hman a ni a. COTPA dan section 7-na bawhchhia a pictorial warning tello a cigarette zawrh an man te chu an tihral bakah Rally neih chhunzawm a ni. He hunah hian Champhai DC leh Anti Tobacco Squad Chairman ni bawk Pu H. Lalengmawia chuan Mizoram chu lehkhathiam neih tam kawngah ram pum huapa pathumna ni mahse zuk leh hmuam hman uar leh a kaihhnawih natna vei tamna ber state kan ni chu thil zahthlak tak a nih thu sawiin, kan nun kan inenlet, sum lakluhna atan kan hmangte hi a fel ber em tih kan ngaihtuah a tul a ni, a ti.
DC Pu H. Lalengmawia chuan Mizo thalaite zingah sualna a hluar ta hle hi do a, siamtha turin pawl pakhat emaw kutah chauh innghah a tawk loh thu sawiin, chhungkuaah bul tana, naupangte hmuh theih turin thu mai piah lamah nunzia ah nu leh pa leh kum upa zawk ten kan nunah zir tur an hmuh a pawimawh hmasa a ni, a ti a. World No Tobacco Day hmanga kalkhawm zawng zawngte chu an thiante leh chhungkua ah vaihlo in hriselnaah a nghawng that loh dante, COTPA Dan bawhchhiatna leh hremna te chu midang hrilh hre chhawng tur ambassador-a an indah vek chuan he ni hian awmzia a nei hle dawn a ni, a ti a. Vawiin hun hmang tura kalkhawmte chu thianghlimna, hriselna, rinawmna leh taimak kawnga mi entawntlak ni theuh turin a chah a ni.
Vawiin hun hi Pu V.L Bela, Vice President, Indian Society on Tobacco and Health: Mizoram Chapter chuan telpuiin, kalkhawm zirlaite hnenah vaihlo thatlohna hrang hrang, taksa leh rilru a harsatna lian tak tak a thlen theih dan a sawifiah a. Nun uluk pawimawhzia tarlangin, tunlaia boruak chhe tawh tak karah hian huaisen taka chin thalo ti ve duh miahlo an la awm hram hram avangin hnam leh ram hi kan la nung hrih a ni, a ti.
Vawiin programme hi Dr. J. Lalramchhuanga, Member Secy., Anti Tobacco Squad, Champhai chuan kaihruaiin, vaihlo leh a kaihhnawih thil te hian a hmangtu chauh ni lova an bulhnai ami te hriselna thlengin a tihbuai thin avangin vaihlo do hi nasa taka kalpui a tul thu a tarlang a ni. Pu Lalnunmawia, Principal, Govt. College chuan hunserh a hmang a, Pu Lalthamawia Bolchhim, Working Member Secretary chuan lawmthu sawiin hun a khar a ni.
Vawiin hunah hian Champhai SP Pu RP Meena; Mizoram State Tobacco Control Society District Coordinator, Champhai Pi Vanlalmuanawmi; Anti-Tobacco Squad leh District Level Task Force member-te bakah GM Higher Secondary School naupangte an tel a ni.
