“Zirna Inah zirtirtute hi zirlaite tan hmuh theih Pathian an nih avangin An finna na leh thiamna lo parchhuahna bul chu an zirtirtute ah a ni thin” - TT Zothansanga, MLA

Aizawl 5th Sept. : Zirtirtute Ni Kum 50 na ram puma hman anih rualin Champhai District chhunga zirna in tinah vawiin chawhma lam khan urhsun taka hman a ni a, chawhnu dar 1 khan Champhai I & PR Auditorium-ah sawm bikte pualin he ni hi hman chhunzawm a ni.

He hun Champhai SDEO Pu C. Lalrizapa kaihhruaiah hian Pu TT Zothansanga Champhai North Bialtu MLA chu khuallian niin Champhai District chhunga zirtirtu hna thawk tha pangate hnenah lawmpuina thuziak a hlan a, Champhai DC Pu Vijay Kumar Bidhuri chuan thu a sawi bawk.

Khuallian Pu TT Zothansanga chuan amah chherchhuaktu zirtirtu te, khawtlanga amah lo kaihruaitute hmaa khuallian  nih chu nuam a la tih theih loh rualin khuallian a ni thei erawh chu a in chhuan thu a sawi a, zirtirtute hian kan zirlaite hnena tih tak zeta thu kan hrilhte chu an damchhungin an theihnghilh ngai tawh lova, chuvangin kan zirlaite mi puitlinga kan chherchhuah theih nan beiseina kan siam sak ang a, an rilruah hlawhtlin duhna rilru nghet kan tuh a ngai a ni, a ti. Khuallian chuan zirtirtute hi khawtlang tana mi pawimawh in ni a, NGO pawl hrang hrangah leh Kohhran ah pawh hruaitu in ni deuh zel a, a lawmawm khawp mai, mahse in hna pui ber, in eizawnna ber zirtirtu hna hi thlahthlam hauh lo turin ka chah che u a ni, a ti. MLA chuan sorkar-in zirna quality tih that a tum a, training pawh a buatsaih ngun hle a, hetihlai hian zirlaite khawvel chenna a sang tawh a, an ngaihtuahna leh suangtuahna ang umpha turin zirtirtute tanlak a ngai a ni, a ti. Tunlaiah sorkar hna lak anih dawnin state pum huap intihsiakna in a kal zel tawh a, Phai lama lehkha zir thiam tak tak te leh Mizoram school tha ber ber zirlaite nen inel tur an nih avangin Champhai a zirtirtute hian tun hma zawng aiin tan kan lak a ngai a ni, a ti bawk.

Thusawitu dang Champhai DC Pu Vijay Kumar Bidhuri chuan Mizoram hi state naupang te nimah ila, India ramah ziak leh chhiar thiam tam lamah 3 na kan ni a, hei hi zirtirtute thawhrim rah a ni a, hetah hian duh tawk mai lovin 100% ni thei tura tan la zel turin ka chah che u a ni, a ti a. Tunlai khawvelah eiawnna leh hnathawh tur hrang hrang a awm ta a, heng career hrang hranga thawk thei turin zirlaite kan chherchhuah a ngai a, zirtirtu in class la a, zirlai bu chhung zirtir ringawt hi a tawk lova pawn lamah kan nungchang leh khawsak dan thlenga an entawn tlak a nung turin ka chah che u a ni. Zirtirtute chu ram siamtu in ni a, taima taka in hna thawka tan la thar leh turin ka chah che u a ni, a ti.

He meeting-ah hian zirtirtu tha, State Award lo dawng tawh mi 5 hnenah lawmpuina thuziak hlan an ni a, chungte chu 1. Pu C. Hualchhunga, Champhai P/S II Teacher (1999); 2. Pu C. Hualrikhuma, Govt. Champhai H/S Teacher (2001); 3. Pu B. Lalzethanga, Modern M/S Teacher, Kawlkulh (2004); 4. Pi B. Thangchhungi, Vengthlang M/S Teacher (2006) leh Pu BL Rintluanga, Kawlkulh P/S Teacher (2010) te an ni. He inkhawmah hian Sub-Hqrs. YMA, MHIP, MUP leh leh zirtirtu pension tawhte an kal tha hle a, kalkhawmte hnenah Teachers’ Day Ball Pen an lo present theuh a ni.