No.533/2021-2022

Dated Champhai, the 15th May, 2021: Vawiin chawhnu khan Champhai District Level Task Force on Covid-19 chu an Chairman Pi Maria C.T Zuali, District Bawrhsap hovin Total Lockdown May ni 24,2021 thlenga hman chhunzawm zel tur chungchang relin I&PR Auditorium, CHANEM-ah an thukhawm.

Pi Maria C.T Zuali chuan inkharkhip hman pawhsei zelah inkaihhruaina thar chhuakte zirchianga, harsatna awm thei lo tur ang berin district mila her danglam a ngaih thin thu sawiin, a khaw hmuna awm leh tawnhriat nei zawk khawtlang hruaitute nena inrawnkhawmna neih tha ni a hriat vanga meeting koh a ni, a ti a. Champhai District chhunga thawhhona tha leh duhawm tak awm chu chhuanawm a tih thu sawiin, VLTF te hmalakna fakawm a tih thu a sawi a. Tha thlah lova thawhhopui zelah a sawm nghal a ni.

Pu Lalnunfela Chawngthu, SDO Sadar chuan district mila inkaihhruaina duan chhin sawifiahin, Mizoram puma inkaihhruaina duante zawm bakah district mila dawr hawn hun, hnathawh leh feh chungchang bikahte ruahmanna siam a nih thu a sawi a ni.

Thukhawm chuan ngun taka a ngaihtuah hnuah district mil tur inkaihhruaina a duang a, State Sawrkarin ruahmanna a siam zingah a hnuaia mi te hi Champhai khawpui chhung a hman tur a tan siam danglam hret a ni:

I. Dawr leh chawhmeh zawrhna chungchang:
1. Mipui mamawh zualpui lam khawm theih nan leh tawt lutuka bazaar loh nan a hnuai ami ang hian dawr hawn hun leh dawr hawn theihte ruahmanna siam a ni:

(a) Thawhtanni, Nilaini leh Zirtawp ni zing dar 5:00 atanga zing dar 9:00 inkarah Insakna leh Mistiri bungraw zawrhna, Agriculture lam kaihhnawih zawrhna dawrte hawn theih a ni ang.

(b) Thawhlehni, Ningani leh Inrinni zing dar 5:00 atanga zing dar 9:00 inkarah eichawp dawr, thlai, chawhmeh leh sa zawrhna dawrte hawn theih a ni ang.

(c) Ni 17/5/2021 (Thawhtanni) bikah Stationary item zawrhna dawrte chu zing dar 6:00 atanga dar 8:00 inkarah hawn phal a ni. A bak ni dangah hawn phal a ni lo.

2. Insakna bungrua (Brick, Balu, Iron rod leh Cement) te chu an dawr hawn niah pawh laklawh thil a tlachawpa hman tur bak hralh chhuah phal a ni lo. A tam tham (motor a trip ngai ang chi) hralh chhuah loh tur a ni.

Chhiatrupna thleng palh thei chi hna thawh hmanhmawhthlak a awm a nih chuan hnathawktu awmna VLTF in recommend siamin leh dawr neitu awmna VLTF te inbe rawnin insakna bungrua hi pek chhuah theih a ni ang a, amaherawhchu pawimawh tak tak leh hna tul zual hmanhmawhthlakah chauh lo chuan recommend loh tur a ni.

3. VLTF ten tawt lutuk leh mipui inhnaih lutuk a bazaar loh nan ruahmanna an siam ang.

4. Bazar a mamawh leia chhuak turte chuan VLTF permit an nei ngei ngei tur a ni.

5. A chunga sawi bak dawr dang zawng (Damdawi dawr tiam loin) hawn phal a ni lo ang a, a chung a sawi bak ni dang zawngah dawr khar tur a ni bawk ang.

6. Champhai khawpui pawn lam atanga Champhaia bazar turte chuan zing dar 5:00 leh dar 9:00 inkara bazaar hman turin ruahmanna an insiam tur a ni.

II. Hmasawnna hnathawh chungchang:
1. Mahni in leh compound chhungah hmanraw awmsa hmangin leh veng chhung mi hnathawktu ruaiin hnathawh phal a ni a, hmun dang atanga hnathawk (labour) rawih phal a ni lo. Hmun khatah mi 5 aia tam in hna thawh loh tur a ni.

2. Leilet leh huana hnathawh tul zual bik, thlai chi thlak leh buh chi tuh tur, ran vulhtute leh sangha dil neitute chu an hna thawh phalsak theih an ni ang a, ram riah pawh phal a ni. Lehlanga hnathawk turte chu zing dar 9:00 ah an chhuak hman vek tur a ni a, tlai dar 5:00 ral hmain an let leh hman tur a ni. VLTF ten an kalna hmun tur leh permit pek chhante, hnathawk tur zatte chiang takin an permit-ah an ziak lang tur a ni.

3. Leilet, huan, sangha dila hna thawk turte hian leilet/huan/dil an nei ngei a ni tih lantirna document (LSC, Periodic Patta, VC Pass, VC hriatpuina lehkha) duty-te enfiah theih turin an keng tel ngei tur a ni.

He hunah hian Champhai SP Pu Lalrinpuia Varte, Addl. DC Pu Henry C.Lalrawnkima, Official dangte leh Champhai Town chhung VLTF aiawh theuhte an tel a ni.