No.531/2021-2022 

Dated Khawzawl, the 15th May, 2021: Vawiin chawhma dar 11:00 khan Pu Zothanmawia, Deputy Commissioner, Khawzawl District, District Level Task Force on Covid-19 Chairman ni bawk hovin Khawzawl Town chhunga Covid-19 Executive Team Leader-te chu DC Conference Hall-ah an thukhawm.

Meeting-ah hian Mizoram sawrkar order anga Total Lockdown kenkawh chungchang thlirletna neih a nih bakah, karleh Thawhtanni, May ni 17, 2021 zing dar 4:00 atanga Lockdown order thar kalpui dan tur chungchangte ngaihtuah a ni.

Deputy Commissioner kaihhruaina hnuaia meeting-ah hian pawnchhuah phalna lehkha pekchhuah chu fimkhur lehzual a kalpui nise, loh theih loh leh tul tak takte chauh chhuah phalna pek nise tiin  rel a ni a. Thawhlehni leh Zirtawpni-a dawr leh bazar hawn chungchanga inkaihhruaina mumal tak siam niin, dawrkaite chuan anmahni dawrtuten social distancing vawng chunga an dawr theihna turin dawr kawtah marking mumal tak siam tura tih an ni a, marking siam lote chu dawr hawn phalsak an ni dawn lo a ni.

Mizoram sawrkarin Khawzawl khawpui chu African Swine Fever affected area-a a puan tawh avangin vawk talh emaw, a sa lakchhuah emaw khap mek niin, Sa leh thlai zawrh hunah pawh vawk talh hi a rem dawn lo a ni.

Vawiina meeting-ah hian Khawzawl khawpui chhunga hmasawnna hnathawh chungchang te, lo leh huana feh leh hnathawh chungchang bakah Covid-19 dan zawm lo man tawh chungchangte pawh sawiho a ni.

April ni 20, 2021 atanga vawiin thlenga Covid-19 Executive Duty ten dan zawm lo an man tawh zat chu mi 193 niin, pawisa chawi tlingkhawm zat hi Rs 39,800/- a ni tawh a ni.

Meeting-ah hian Pu PC Lalchunglura,  Superintendent of Police, DC Pisa Officer-te, Additional SP leh 2nd IR Battalion Dy. Commandant-te pawh an tel bawk a ni.