No.7359/2020-2021

Champhai District chhung 25-East Tuipui Assembly Constituency (ST) huamchhunga Model Village atana thlan Khuangleng khuaah vawiin khan Model Village chungchang inhrilhhriatna leh hmalak zel dan tur  Champhai district Bawrhsap Pi Maria C.T Zuali hovin neih a ni.

Bawrhsap Pi Maria C.T Zuali chuan model village nih avangin a tir atangin engkim a fel nghal vek bik lova, model hlawhtling ni turte'n kawng engkima traning an la hmasa thin angin Model Village ni turin theihtawp chhuaha inzir angaih thu a sawi a. Khawdangte tana entawn tham ni tur khawpa lungrual taka thawhho a tul thu sawiin, hemi kawngah hian VC, NGO leh Sawrkar hnathawkte an pawimawh hle dawn a ni, a ti a. Hriselna ngaihpawimawh a tul thu sawiin, mahni theih ang tawka taksa enkawlte, chaw tha ei leh ruihhlo laka inthiarfihlimte chuan hnathawk thei tura min siam thin thu a sawi a. Nun bulthut hmasawnna hrang hrangte tichangtlung zel chungin khaw dang te'n an rawn hriata ngaihbel chat theih tur hmingthatna entawntlak tak kan siam thiam chuan a hlu hle dawn a ni, a ti a. Model Village ni tura bultan an nih angin hmanhmawh vut vut lova a bulthum atanga hmalak tum turin a chah bawk.

Khuangleng Model Village hmasawn nan line Department  hrang hrangte'n theihtawp an chhuah dawn thu leh Model Village an vilzui tur thu a sawi a. Kawng engkimah sawrkara innghah bur lovin hmasawnna kawnga pawimawh ber mimal hmasawnna ngai pawimawh ber tur leh mahni thawh theihte hlen chhuah tum turin a chah a. Model village an nihna ang taka khaw dangte tana entawn tlak, khaw mawi leh changkang, khaw indodelh ni tura beisei an nih thu à hrilh bawk.

Khuangleng VC Hall-a neih Model Village chungchang zirhona hun hi Pi Laltlansangi, Khuangleng VCP chuan a kaihruaia, Model Village atana thlangtu bialtu MLA Pu Ramthanmawia chungah khaw aiawhin lawm thu a sawi a, Model Village-a a taka kalpui a nih theihna tura Sawrkar department hrang hrang hotute'n a hmun ngeia tlawha zirtirna an neih avangin lawmthu a sawi bawk. 

Vawiin Model Village chungchang inhrilhriatna leh zirhona hunah hian Champhai DC hi Pu Lalduhthlana DFO, Pu George Lalthanngura DAO, Dr. B.Zonghinga DVO, Pu TT Laltanpuia DEO, Dr. Lallawmkima DIPRO, Pu Benjamin Zalawma Ralte BDO, Pu Zothanmawia CDPO Khawbung, Pi Lalhruaitluangi SDEO Champhai leh Official dang te'n an tawiawm a, hlawk zawka buh thar leh ranvulh hmanga ei leh bara intodelh anih theih dan turte, zirna tha zawk nei thei tur leh nungcha leh ramngaw humhalh tulnate, hmasawnna ruhrel siam kawnga pawimawhte leh khawtlang nuna pawimawh hrang hrangte zirtirna neih ani. 

India hnampa Pu Mahatma Gandhi suangtuahna  India rama thingtlang khuate intodelh, hmasawn leh inlungrual taka an khawsakhona tur chu a taka tipuitling thei turin Prime Minister Narendra Modi-a chuan rawn tharthawhin hemi kawnga hmalakna tur Saansad Adarsh Gram Yojana (SAGY) chu October Ni 11, 2014 khan a hawng a.

SAGY Scheme hman tan theih tura hawn anih hnu hian MP leh India ram chhung State tina MLA te pawh an Constituency huamchhung theuhah Model Village  khua thlang theuh tura tih an ni a. Sawrkar laipui Ministry of Rural Development chu Nodal Department an ni. 

Model Village hi duhsakna luanluhna hmun tur a ni lova, ruahmanna felfai leh rintlak, hmalakna mumal leh tha, langtlang taka thawhhona hmun anih avanga entawntlak 'Model' ni tura thlan tihna ani. Model Village-a puan tawh chuan kawng tinrengah hmasawnna kawng a zawh tur a ni a. A hranpa in fund a awm lo a, Sawrkar laipui atanga hmasawnna hna thawhna atana Fund awmsate hmang tangkaiin remna apiangah line department hrang hrang te'n an sum leh thiamnate an thawh khawm thin dawn a ni.