Vawiin khan Champhai Bawrhsap Pu H. Lalengmawia hovin DC Conference Hall-ah khawtlang hruaitute bakah MJA leh Truck Owners' Association hruaitute thukhawmin khawchhung inrelbawlna kawnga hmalakna hrang hrang leh thawhho dan tur an sawiho a ni.

DC leh District Magistrate ni bawk Pu H. Lalengmawia chuan khaw chhunga ui leh ar khuahkhirh hmalakna chuan awmzia a neiin, mipuite tawiawmna pawh a tha hle nia a hriat thu a sawi a. Hemi kawngah hian inthlahdul lova, chak tak a hma lak zel a nih tur thu sawiin, Sorkarin ui vulh a khap miahlo a, amaherawhchu a vulhtuten an mawhphurhna te an hriat a, thenawm leh khawtlang tana hnawksak an nih loh chu he khapna order hian a tum zawk chua ni, a ti a. A tul a nih chuan ui khuahkhirhloh man te chu a neitu hming chanchinbu ah tarlan a nih tur thu a tarlang a ni.

Kawngsir phallohna hmun a leivung paih an la awm thin chu DC chuan thil veiawm tak a nih thu sawiin, leivung paihna tur bik khaw pawn hla vaklo a siam tum a nih thu a tarlang a. Phallohna hmun a paih avangin, fur ruahtuiin a hnuai leiletah len thla in, leilet hmantlakloh a siamin, harsatna nasa tak tawk thin an awm thu tarlan a ni a. Khawtlang hruaitute pawhin an theihtawpa a tawiawm tur thu an sawi a ni.

Heng bakah hian vawiin meeting chuan UD&PA bawlhhlawh paih motor indaihlohna phuhruk tura VC lamin tan lak pui chungchang te, motor parkna tur hmun bik siam te leh hemi ngaihtuah tura hmalak dan tur te, zirna kawnga hmalak zel te leh fur ruahtui tlak hmaa tui hawk luan kawr tih fai te sawiho a ni. Meeting-ah hian SDO (S), SDC-te leh DIPRO te an tel a ni.