Vawiin khan Pachhunga University College Aizawl ah ni khat awh State Level workshop on Science for Nation Building neih a ni.
Mizoram Science Society (MSS) leh Mizoram Science, Technology and Innovation Council (MISTIC) DST, Mizoram sawrkar tangkawp te buatsaih ah hian Dr C Vanlalramsanga , IES Secretary, Planning Department chuan Keynote Address a sawi hawng hmasa a, hemi chungchang hi sawihona hun hman zui a ni. Dr C Vanlalramsanga chuan Science and Technology chu ‘Engine of Growth’ tih anih thu sawiin, mithiam te chuan technology chu ram hmasawn nana hman tangkai dan kawhhmuh turin ‘academics’ a pawimawh tih a sawi a, a taka hmanna tur buatsaih turin sumdawnna leh hnathawhna (business and industry) te an pawimawh leh a, hetih lai hian thiamna leh a taka hmanna thlunzawm turin sawrkar a pawimawh ve thung a ni a ti a. Hetiang thiamna hmanga hmasawnna thlen tur hian Mizoramah Science and Technology chu ram din chhuahna leh hmasawnnan engtiang chiah in nge hman tangkai anih tih leh tangkai zawka hman theih dan tur chu an sawiho tur ber anih thu a sawi hawng hmasa a ni.
Dr Vanlalramsanga chuan Mizote chu Science and Technology ah thil thar ber ber hre ve zelin kan mikhual lo hle tih a sawi a, ram hmasawnna leh dinchhuahna tur hawi zawngin kan hmang em tih erawh zawhna pawimawh tak anih thu a sawi a, hetiang anih avang hian hemi lama zirna leh thiamna te chu ataka ram hmasawnna atana hman anih theih nan tan lak a tul hle tih a sawi a. Technology ban phaka awm te chu tangkai thei ang bera hman dan zawn a pawimawh tih sawiin, Science and Technology hmasawnna hman thiamna apiangah ram hmasawnna a kal chak tih a sawi bawk.
He workshop ah hian sawihona hunah thupui chi hrang hrang - Ram hmasawnna kawnga Science and Technology tangkai zawka hmang turin Mizoram a Science zirna kalpui dan siamthat ngai a awm em. Mizoram a skills mission a hlawk thei ang bera kalpui dan tur ni a ngaih te, technology kan ban phak a awm mek te ram hmasawnna atan tangkai zawka hman anih theih nan a hmalak dan tur kawng harng hrang te, tih leh Knowledge Based Economy lama chak zawka kal turin engtinnge hma kan lak ang tih hmangin sawihona hun hman a ni.
He wokshop hi Pu C. Lalhmachhuana, Vice President, Mizoram Science Society in a kaihruai a, tlai lamah Pu C. Lalduhawma , Mizoram Science Society kaihhruaina hnuaiah an pawl Life Member Brig T. Sailo sunna hun leh report hrang hrang ngaihthlaknan leh hruaitu thar thlan nan hun hman a ni.
State Level workshop on science for nation building hi Science lama sulsuttu Dr. L N Tluanga, Dr. Kapthuama leh Er. Dunglena te leh College hrang hranga science lam mithiam ten an hmanpui a ni.
