Vawiin khan Champhai Bawrhsap Pu H. Lalengmawia hovin Champhaia NLUP Line Department-te chu inhmukhawmin, an department theuh dinhmun leh harsatna an neihte an sawiho a; NLUP Revitalisation Programme kalpui dan tur te ngaihtuah a ni bawk.

DC Pu H. Lalengmawia chuan NLUP hlawhtlin kawngah Line Department-te mawhphurhna a san thu sawiin, beneficiary-te hnathawh vil ngun turin a chah a. NLUP programme chu tha viau mahse a hlawkpuitu tura thlanten a tangkaina an hriatchianloh chuan hlawhchhamna a thlen theih avangin beneficiary-te thinlung buatsaih hmasak a pawimawh a ni, a ti.

Vawiin meeting-ah hian Line Department hrang hrangten an hmalakna leh hmabakte an sawi hlawm a. Department tin ten an hnuaia beneficiary-te hnathawh dan leh hlawhtlin dan report felfai tak siam chungchangte rel tel a ni. NLUP Revitalisation Programme, NLUP 3rd leh 4th Phase beneficiary-ten an hriat tur mamawh inhrilhriatna leh tharthawhna programme chu March ni 11-a hman tur niin, programme hman dan tur te vawiin hian ngaihtuahho a ni.