Vawiin khan Champhai District Level Town Vending Committee chu an Chairman DC Pu Vanlalngaihsaka hovin kawngsira inzuar (street vendors)-te tana Dan siam The Mizoram Street Vendors Act, 2011 chungchanga hmalak zel dan tur relin DC Conference Hall, Keifangtlang-ah an thukhawm.

DC chuan Street Vendor-te eizawnna chu mumal zawka kalpui theih dan sorkarin Dan fel tak behchhana a ngaihtuah sak tur chu thil tih awm reng a nih thu leh, chumi atan chuan uluk taka committee member-ten ngaihtuahna sen a pawimawh thu a sawi a. Vendor Act hian a tum chu vendor-te humhalh a puihbawm a nih rualin, khawtlang tana hrisel leh tha zawk tura thlak danglam ngai te a awm chuan thlak a tul thu te; mi harsa zawk te pui tura hmalak anih laia mi thiltithei zawk pamham taka lo ti duh awm palh thei te laka venhim te a ngaih tel thu sawiin, felfai taka he Vendors' Act hi kalpui ni se a tih thu DC chuan a tarlang a ni.

Vawiin thutkhawmah hian Town Vending Plan hnuaia Vendor Registration fee tur zat bithliah te, inphona tur hmun hauh fel tawh sa a vendor-te inrem dan tur leh bazar hmun awl hman tangkai theih dan tur te, Christmas vuakveta kawngsir a inzuar duhte tan mumal leh mipui tana harsatna siam lo thei ang bera an inphona tur hmun duan sak dan te ngaihtuah a ni.

Street Vending Plan hi National Urban Livelihood Mission hnuaia component pakhat niin, street vendor-te inphona tur hmun bik hauh sak a felfai zawk a khuahkhrihna dan siam mai bakah, awlsam zawka loan hmuh pui dan ngaihtuah te, training pek leh a tul anga tanpuina dang hrang hrang pek te a huam a. Ei leh in leh thildang vendor-ten an zawrh chu khawtlang hriselna atan pawi thei a awm loh nan enfiahte a tel bawk.