Ni hnih awh tur Agriculture Technology Management Agency (ATMA), Champhai District Exhibition chu vawiin khan Champhai DC Pu H. Lalengmawia'n Champhai Town Hall-ah a hawng. He exhibition-ah hian Champhai District chhunga kuthnathawktute bakah Agriculture leh Allied Department ten an thil thar leh hmanrua te mipui en theihin phochhuakin, participant 170 an awm a ni.

DC Pu H. Lalengmawia chuan kuthnathawktute tan ATMA in exhibition a buatsaih chu finthlak a tih thu sawiin, participant-ah te tha zawk leh tam zawka huan thil thar duhna chochhuaktu a nih ngei a beisei thu leh, exhibition chhimtu mipui ah pawh mihring nun a agriculture pawimawhzia hriatchhuah tirtu a nih a beisei thu a sawi a. Agriculture leh a kaihhnawih (allied activities) te hi a hlawhtlinna tam ber chu ram leilung leh sik leh sa a innghat a nih rualin, ram dangah chuan thiamna thar te an hman tangkai avangin agriculture atana hmun thalo a ngaihte pawhin thahnem tak tak an tharchhuah theih phah a. Chumi hre reng chuan Champhai District ATMA pawhin thahnemngai takin kuthnathawktute technology hman tangkai kawngah hma lakpui a, chipchiar taka zirtir zel turin DC chuan a chah a ni.

Vawiin Exhibition hawnna hun hi Pu Lalthanzuala, Project Director, ATMA leh Champhai DAO chuan a kaihruai a. Agriculture leh Allied Department atangin category hrang hrang 22-ah exhibition hi neih a ni a. Participant ten nnmahni thar ngei thlai, thei leh pangpar khawiah ten lawmman siam a ni a. Anni bakah hian Stall/ dawrte siam te thil entir chu exhibition neih chhung hian mipuiten an dawr thei reng bawk a ni.

Exhibition ah hian Champhai District chhung hmun hrang hrang atang kuthnathawktute lo kalin, anni bakah AH&Veterinary Department, Horticulture Department, Sericulture Department, Forest & Environment Department, Agriculture Department, ATMA, Fidheries Department-te bakah Champhai Grape Growers' Society, Florist Association, KVK, Farmers' Plaza, Farm Machineries leh Kim Tea Biate ten Stall an hawng a ni.