Vawiin khan P.K. Bhakshi Intellectual Property Right Advocate, chuan Mizo kut chhuak hnam incheina hrang hrang humhalh dan tur sawipuiin Pu Joseph Lalhimpuia, Parliamentary Secretary Industries department chu a chenna in ah a kawm.
An inkawmnaah Pu Joseph Lalhimpuia hian mizo hnam incheina kan puan mawi tak tak Pi leh Pu atanga kan lo chhawm tawh puan chi hrang hrang te hi dan hmanga humhalh leh neitu nihna kan neih loh chuan ram pawn a thawn chhuahna kawngah harsatna kan neih theih dawn avangin Chief Minister Pu Lal Thanhawla leh Pu H. Rohluna, Industries Minister ten an ngaih pawimawh thu lo hrilh in hemi kawngah hian Pu P.K.Bhakshi chu North East India a Intellectual Property Right Advocate awmchhun a nih angin hemi kawnga sawrkarin chak tawk a hmalak a duhthu a hrilh a ni.
Pu P.K.Bhakshi Advocate hian mizo hnam incheina mawi tak tak Puan te, khumbeu te hi neitu nihna neih mumal loh chuan Foreign a thawn chhuah kawngah harsatna a awm theih dawn bakah Company leh ramdangte pawhin neitu nihna an hauh theih avangin Intellectual Property Right hnuaiah hian Geographical Indicators leh design copy right neih thuai a tul thu a sawi lang bawk. Geographical Indicators (G.l) hi kum hnih chhung lai buaipui a ngaih a rin thu leh Design bikah hian kum khat chhung a tihfel a beisei thu a sawi bakah theihtawp chhuahpui a tum thu a sawi a. Mizo incheina humhalh kawng ah sawrkarin hetianga rilru a senna chu fakawm a tih thu a sawi bawk.
