Vawiin chawhnu ah khan All India Radio, Aizawl chuan FM radio signal chak zawk a thawn chhuak thei, Digital 6 Kw FM Transmitter tlangzarhna hun FM Station, AIR, Aizawl ah nei a.  All India Radio, Aizawl  ngaithla tute puala  Larsap Lt.Gen(Rtd.) Nirbhay Sharma  thuchah ngaihthlakna  in  programme  hi tan a nih hnuah ah FM transmitter  thar hi hman tan nghal  tura hawn a ni.

AIR hmasawnna lawmpuitu Larsap Lt.Gen(Rtd.) Nirbhay Sharma  chuan Mizoram Buai Kum, 1966 a bul tan, All India Radio  hlawhtlinna chu fakawm a tih thu sawiin hmasawnna kawnga  Mizoram tana hmanraw pawimawh berte zinga mi a ni a ti.  Vawiin a signal tha zawk pechhuak leh tura  AIR a in buatsaih leh ta chu Mizoram tan hlawhtlinna mellung langsar tak a ni a ti. Chanchinthar rintlak chiah puang chhuak thin a nih avang in Mizoram ah chuan Media hmahruaitu, mipui ten an rinngam a ni a. AIR atanga rimawi, zirtirna leh programme hrang hrang chhuak thin te hian Mizoram mipuite hlimna leh lawmna asiamsak piah lamah zirtirna hlawhtling tak  a pe tel thin a ni a ti. Tunlai khawvel  thangmek zelah  Mizoram chhungah ngei pawh  cable TV, satellite TV  te awm tawh mahse ; mipui in rinna an nghah ngamna a nih avang in AIR, Aizawl,  pawimawhna hi a nep chuang lova. Hmasawnna tur erawh an nei zel dawn a ni  tih hre chunga hna an thawh phawt chuan an pawimawh zual zel ang a ti. Lai, Mara, Hmar leh Chakma puala programme an siam te chu tangkai a tih thu sawiin  Mizoram chhung mai ni lo, India ram pumpui chhunga cheng,  hnam hrang hrang te inpumkhatna atana hna pawimawh tak  thawk chhunzawm zel tur in AIR, Aizawl hi duhsakna a hlan a. Mizoram mipui te pawh radio programmes hmang tangkai chhunzawm zel turin a chah a ni.

New Digital 6 Kw FM Transmitter  Launching programme hi Pu D.R.Lalropuia, Director (Engg), AIR in kaihruaiin  he hunah hian AIR station Official te leh sawmbik ten thusawina hun hmang in an infuih thar leh a ni.