Lunglei East bialtu leh Parliamentary Secretary, Education etc. ni bawk Pu Joseph Lalhimpuia chuan a bial chhunga ‘Model Village’ tura thlan Rotlang ‘E’ chu nimin khan a tlawh.

‘Model Village’ lawmna inkhawm Rotlang ‘E’ VCP Pu Lawmsanga kaihhruaiah Pu Joseph Lalhimpuia chuan kawng hrang hrangah Rotlang ‘E’ mipuite tanrualna leh taimakna a hmuh thin chuan ‘Model Village’ atana thlan an nih chu an phu hliah hiaha a hriat thu a sawi a. Rotlang ‘E’ khawtlang hruaituten an khuaa High School awm loh thu a hnena an thlen chu tunah RMSA hnuaiah High School din a nih theih ta chu a lawmpui thu a sawi bawk a. Lunglei District chhungah zirna tihhmasawn nan Education Dept chuan sum awm ang angin school tam tak a thawmthat mek thu sawiin Pu Joseph Lalhimpuia chuan an hmalakna zarah Mizo Medium sikul zawng zawngte chu zirlaibu inang an hman vek tawh a, English Medium sikulte pawh zirlaibu inang vek an hmang tawh a ni, a ti. Khawtinah School Management Committee din a ni vek a, heng hian an khuaa sikul dinhmun, zirtirt leh zirlai te hmasawnna ngaihtuah tur an nih angin zirna lama sorkar hmalaknaah theihtawp an chhuahpui a pawimawh a ni, a ti.

Pu Joseph Lalhimpuia chuan Rotlang ‘E’ chu ‘Model Village’ atana thlan a nih angin sorkar lam pawhin theih ang angin khaw mipuite hmasawnna tur a ngaihtuah sak tur thu sawiin an khaw chhung kawng (internal roads) te black-topping a nih tur thu te, kawlphetha lakluhna extension an mamawh pawh phuhruk sak an nih tur te, an khaw chhunga culvert leh retaining wall siam tulna lai pawh siam sak an nih tur te, playground leh Hall pawh tihchangtlun tum a nih thu te a tarlang a. Rotlang ‘E’ ah coccoon khawitu an tam avangin hemi lama an mamawh pawh Sericulture atangin ngaihtuah sak a tum thu a sawi bawk a. Pu Joseph Lalhimpuia chuan Rotlang ‘E’ 'Model Village' puan lawmna thing 'Bung' a phun a; Rotlang 'E' khuaa Primary School 2, Middle School 1 leh High School 1 hnenah football 1 leh volleyball 1 theuh a hlan nghal bawk a ni.

Rotlang ‘E’ YMA Hall-a inkhawm neihah hian Rotlang ‘E’ VCP Pu Lawmsanga leh Branch YMA President Pu H.Lalchamliana ten an khua chu ‘Model Village’ ah thlan a nih chu lawmawm an tih thu an sawi a, kawng hrang hranga hmasawnna an hmuh zel avangin bialtu MLA Pu Joseph Lalhimpuia chungah lawmthu an sawi bawk a ni. 

‘Model Village’ thlan an nih lawm nan Rotlang ‘E’ khua chhungkaw tin ten thawhlawm thawhin nimin tlai khan ruai an buatsaih a, Khuallian Pu Joseph Lalhimpuia, amah tawiawmtu Department officials te leh khaw mipuiten ruai hi an kilho a ni.