Champhai District Badminton Association (CDBA) leh Mizoram Badminton Association (MBA) tangkawp buatsaih Badminton inelna lian  Champhai Open 2019, MBA Ranking Badminton Tournament chu vawiin khan Champhai District Bawrhsap Dr. Naveen Aggarwal, IAS chuan Champhai Town Hall-ah a hawng. Badminton thiam rualte inelna MBA  Official  Ranking Categories leh CDBA Non Ranking Category huanga inelna hi October Ni 1 atanga Ni 4, 2019 thleng awh tur a ni.

Hawnna hunah thusawiin Dr. Naveen Aggarwal chuan Champhai Open 2019 a tel tuma lokal infiammi zawng zawngte chu Champhai District mipuite aiawha thinlung taka a lo lawm thu a sawi a. Mizote chu infiamna ngaina tak ni a a hriat thu leh abik takin Badminton inelna huangah theihna nasa tak  Mizo ten an nei a ni, a ti a. Tata Trust nodal organization,  North East Initiative Development Agency (NEIDA) leh Pullela Gopichand Badminton Academy (PGBA) tangkawpin Mizorama Badminton chawisanna tura hma hrang hrang an lak mek thu leh he hmalakna hmang hian naupang leh thalai tam zawk ten  hmasawnna an hmuh ngei a beisei thu a sawi a. Badminton huanga inelna hmang hian Mizo thalaiten India ram mai bakah khawvel huapah chawimawina hrang hrang an lak theih ngeina turin duhsakna a hlan a, Badminton chuan Mizo mipuite leh India ram mipuite inkarah inunauna nasa zawka  a thlen ngei a beisei thu a sawi bawk a ni.

Vawiin Champhai Open 2019 hawnna hun hi Pu Lalnunmawia, President, CDBA chuan a kaihruai a. Pu Paul Zakhuma, Gen Secretary & Organizing Secretary hnen a tangin inhmelhriattirna hun hman a ni a. Pu H.Rothangliana, SR. Vice President & Organizing Chairman-in kalkhawmte lawmma  thu a sawi hnuah Champhai Open 2019 tournanment hi Champhai Town Hall-a Badminton Court pathumahte khelh tan nghal a ni.

Champhai Open 2019 a tel tur hian Mizoram hmun hrang hrang atangin Badminton Player thiam rual 226 an fuankhawm a, MBA Official Ranking Categories;  Men’s Singles, Women’s Singles, Men’s Doubles, Women’s Doubles leh Mixed Doubles inelnate neih anih dawn bakah CDBA Non Ranking Categories-ah kum bithliah huang inlena neih ani bawk ang.