Vawiin chawhma khan Aijal Club Conference Hall-ah India sawrkar inrelbawl dan leh Myanmar leh India sawrkar inlaichinna zirchiang tura rawn zin Republic of the Union of Myanmar sipai hotute  leh Mizoram  Sawrkar hotu pawimawhte an inkawm.

Vawiin inkawmhona hun hi Pu Ashish Kundra, IAS, Commissioner/Secretary, General Administration Department, Govt. of Mizoram in a kaihruai a, Myanmar sipai hotute lawmna thu sawiin an inkawmhona in rah tha a chhuah ngei a beisei thu a sawi a ni. Pu Ashish Kundra hi powerpoint presentation hmangin India ram democracy kalphung leh Parliament leh State Legislative Assembly inrelbawl dan te a sawifiah bakah, Election Commission of India kaltlanga inthlanpui buatsaih a nih dan te a sawifiah a, Electronic Voting Machine leh VVPAT hman dan te a lem nen entir a ni bawk.
Vawiin inkawmhona hi session hnih a then niin Session hmasa ah Indian Democracy leh Election buatsaih a nih dan zirho a ni a, Session hnihna ah law and order chungchangte, Tourism chungchangte, Art & Culture bakah Trade & Commerce chungchang leh thilpawimawh dang tam tak sawiho a ni. He sawihona hunah hian ramri kaltlanga dan in a phalloh thil chi hrang hrang ruihhlo tawlhruk, human trafficking, smuggling chi hrang hrang chungchang te sawilan niin Myanmar sipai hotute pawhin rilru inhawng takin an dawngsawng a, engtia hmalak ho nge tha ang tih te an sawiho a, ramri kaltlanga insumdawntawnna ah awmze nei zawk leh tha zawka hmalak dan tur te sawiho a nih bakah hnam ziarang leh khualzin inkalpawh tawn kawnga hmalak dan tur chi hrang hrang te an sawiho a ni.

Myanmar military delegates te hi National Museum and Library (NMML), New Delhi a hotuten an rawn tawiawm a, Myanmar Sipai hotu sawm (10) rawn kal in Lt. General Aung Lin Dwe, Office of the Judge Advocate General, Maj. General Soe Naing Oo, Maj. General Than Hlut Thein, Colonel Khin Maung Kyi, Colonel Kyaw Soe Oo, Colonel Kyaw Lin Maung, Lt. Colonel Than Soe, Lt. Colonel Khin Zaw leh Captain Thet Zin Aung te an ni a. Mizoram sawrkar hotulian he inkawmhona a tel te hi Pu SBK Singh, DGP, Pi Esther Lalruatkimi, Commissioner/Secretary, Tourism Department, Pu Vanlalchhuanga, Commissioner/Secretary, Finance Department, P. Jawahar, Secretary, Commerce & Industries Department, Dr. C.Vanlalramsanga, Secretary, Planning & Programme Implementation Department leh Dr. Lalzirmawia Chhangte, Secretary, Art & Culture Department te an ni.