Vawiin khan Champhai District-ah Ramkang Ven Hapta hman tan niin, a hawnna inkhawm, Champhai Venglai Community Hall-a buatsaihah Champhai DC Pu Sangdingliana chu Khuallian a ni a. “Ramngaw, hnim leh nungchate ngaihsak lova, a tichereu zawnga kan kal chuan keini mihringte zawk hi a tuar nasa ber tur kan ni a, kan tu leh fate nitin inrelbawl dan tur thlengin kan khawih khawlo thei a ni”, a ti.

Pu Sangdingliana chuan a sawi zelnaah ramkangin pawi nasa tak a thlen thin thu leh, a pawizia hriatfiah kawnga mipuite pawhin hma kan sawn chhoh hret thu a sawi a. Fire Prevention week pawh hman a nih chhung chauh mai nilova, a hapta ral hnu ah pawh ramkang laka inveng reng turin hmalak theuh tur a ni, DC chuan a ti a ni.

Vawiin hun hi Champhai DFO Pu Vanlalchuailova chuan kaihruaiin, ramkang laka venhimna hna thawh chu Forest Department leh tlawmngai pawl thenkhatte chauh hna pual a nih loh thu leh, mitinin mawhphurhna kan nei a, fimkhur kan zir a pawimawh thu a sawi. He huna thusawitu dang Pu VL. Chama Hnamte, President Sub-Hqrs. YMA chuan ram chhanhim leh ram tihhmasawnna hna thawk turin pawisa lut tur mitmei chunga hlawhfa rilru pu lovin, thahnem ngai taka inpawhna tha tak nena thawk zawk tur kan ni, a ti a ni.

Fire Prevention Week hawnna inkhawmah hian Sorkar office hrang hrang hotute leh khawtlang hruaitute leh chanchinthar lakhawmtute bakah Primary leh Middle School zirtirtute leh naupangte an tel a. Hun hi Pu PC Laltanpuia, ACF in lawmthu sawiin a khar a ni.