Vawiin khan Champhai DC Pu H. Lalengmawia chuan DC Conference Hall-ah Champhai District chhunga Sorkar Office hotute leh tlawmngai pawl hrang hranga hruaitute leh Kohhran hotute nen inkawmna hun a nei a ni.

Champhai DC Pu H. Lalengmawia chuan District inrelbawlna chungchanga beiseina a neihte sawiin, department tinte thawhhona tha tak an neih a pawimawh thu a sawi a. An harsatnate inhriatpui tlang a, awlsam zawka inpuih tawn dan kawngte sawiho thin turin a chah a, chutianga hmalak chuan district tana an hnathawhna pawhin hma a sawn leh zual a rin thu a sawi a. Chumi rual chuan sorkar hnathawkte chu taimak leh hun vawn dik kawnga harh thar leh vek turin kalkawmte chu a sawm nghal a ni. DC chuan zirna kawnga hmalak a ngaihpawimawh thu tarlangin, nu leh pa te pawh an fate zirtir turin school a thawkte chauh ring lovin, mawhphurhna mitinin kan nei tih kan hriat thar a tul a ni, a ti bawk.

Vawiin meeting-ah hian Champhai Addl. DC Pu R. Vanlalsawta, Champhai SP charge la mektu Addl. SP Pu V.L. Lura Hauzel leh Department Head of Office-te an tel kim hle a. Department hrang hrangte leh tlawmngai pawlten an hmalaknate bakah harsatnate an thlen chu DC chuan ngaihthlak sak in, mumal taka hmalak zel dan tur an sawiho a ni.

Tukin zing khan Champhai DC Pu H. Lalengmawia chuan DC Complex panna kawng a phalna la lova leivung an paih thin chu a hmunah kalin, thenfai hna an kalpui mek chu a enfiah a ni. Helai hmun a leivung paih chungchangah hian khapna thupek chhuah a ni tawh a, dan bawhchhia cu an chungah hmalak a ni dawn a ni.