Vawiin khan Health Minister Pu Lal Thanzara’n High School Field Zarkawt atangin District hrang hrang pan tur National Vaccine Van a vai liam.

Pu Lal Thanzara chuan sorkar laipuiin Mizoram Health Department hnathawh that hriatpuia a thlawna National Vaccine Van sawm lai a pe chu lawmawm a ti a. Vaccine lak that avangin natna leh thihna hial pumpelh theih a nih hriain sorkar chuan naupangte’n a hun taka vaccine an lak hi a ngai pawimawh hle a. Tunah hian India ramah naupang nuai 89 velin vaccine dawnglo anga chhut a ni a. A bika thlan District 201 ah sorkar chuan vaccine pek beihpui a thlak dawn tih sawiin Mizoram chhungah District pali, Lawngtlai, Lunglei, Mamit leh Saiha District te hi High Focus District ah telh ve a ni, a ti. Health Minister chuan sorkarin mipui hrisel zawk nan hma chak takin a la mek a, department tha tichak turin thawktu Doctor leh Nurse engemawzat lak belh mek an ni a, thingtlang kilkhawr zawkah te dah an ni ang, a ti a. India ram hmun thenkhata darh mek Swine Flu lakah Mizoram mipuite kan him theih nan ruahmanna tha tak siam a ni, a ti bawk.

Pu Lal Thanzara chuan Kolasib-a tunhnaia nu nau chunga thi chungchangah chhiat tawk chhungkua chu mimal leh department angin a tuarpui takzet tih sawiin thil awmdan te chhui chiang turin Senior Officer-te a hmunah tirh mek an ni a, department lamin tih dikloh an nei anih chuan an tuar mai tur a ni, a ti. FIR thehluh a nih chungchangah Social media kal tlangin thisen man pek tur neihloh avanga dawng lo leh thisen pek har avanga thi ni awmin thu a thang a. Thisen hi vanduaina tawk ta hnenah hian unit 3 pek chhuah a ni a, a dawngtu tur thisen nen a inmil em tih leh a thianghlim tawk em tih te khawl hmanga sawngbawl hun chhung hi darkar chanve vel lai a awh a, vanduai thlak takin damlo hian unit khat leh a chanve vel chauh a la hman a ni tih sawiin Health Minister chuan thisen man neih loh vang leh pekchhuah duhloh vanga nunna chan a ni lo tih Mizo mipuite’n hria se a duh thu a sawi. RSBY a in register-te; BPL zawng zawngte; thalasemia, haemophylia, aplastic anaemia vei te leh emergency a blood pek ngai chhungte awmlo (e.g. accident) ah thisen sawngbawlna man blood processing charge hi chawi a ngai lova. Thisen mamawhtu te’n processing fee pawisa chawi tur an neih loh emaw remchanglo anih pawhin thisen chu an pe chhuak ngei ngei tur a ni tih hriattirna hi Health Department-in a tichhuak tawh a ni, Minister chuan a ti bawk.

He huna thusawitu dang Dr K.Ropari, Principal Director pawhin vaccine lak that pawimawhzia sawiin hri danna man to tak tak, India sorkarin a thlawna mipui mimirte kawtkai maia lak theih tura a chhawp chhuak sak hi ngai pawimawha, natna tam tak an pumpelh thei dawn tih hriaa an tu leh fate lo lak tir ngei turin mipuite a ngen a ni.

National Vaccine Van hi ni sen sa leh lum lutuk ti zia awm tura insulation tha tak nei leh kawng nal leh chhe deuh pawha tang mai lo tura company lamin a bika an siam a ni a. India sorkarin hri danna vaccine-te a vawn that dan tur ang thlapa vawng chunga, a bikin nu leh naupaite pek tur District leh thingtlang kil khawr zawkah te phurh thlen theihna tur hmanrua a ni a. Kum 2013 khan Mizoramin pahnih a dawng tawh a, tunah hian pariat dawn belh lehin a vaiin sawm a dawng ta a ni.