No.5199/2020-2021

Dated Champhai, the 18th, September, 2020: Vawiin khan Champhai Bawrhsap Pi Maria C.T Zuali chuan district chhung khaw hrang hrang Tualcheng, Lungphunlian leh Hnahlan khuate tlawhin khawtlang hruaitute nen inkawmhona hun an nei a, khawtlang hmasawnna tura hmachhawpte leh hmalak dan turte a sawipui a ni.

Pi Maria C.T Zuali chuan Champhai District Bawrhsap hna a chelh hnuah District khuate a theih ang anga tlawh chhuah vek a tum thu sawiin, khawtlang hruaitu thlan tharte leh NGO aiawhte khawtlang hmasawnna atana hmalak dan turte sawipuia, mitthla a lang thei tura a hmun ngeia kala tlawh kual anih thu a sawi a. MNREGS, FOCUS leh Sawrkar scheme dang dangte hmanga hmasawnna tluantling leh chhawrnahawm tak siam anih theihna tura hmalak tum anih thu sawiin, district chhunga hmasawnna ruhrel siamna tura Sawrkar duan scheme hrang hrangah Chairman anih angin khaw mite mamawh leh thatpui tur thilte sawipui tura tlawhkual anih thu a sawi a. MNREGS kaltlangin khaw tin atanga chawikan ngai zual thlanchhuah chhungkaw 5 theuhte thlanga eizawnna ngelnghet an neih theihna tura chhawmdawlna leh kaihhruaina pek tum anih thu sawiin, hmasawnna rualkhai mitinte thleng pha siam tum a ni, a ti bawk.

Champhai district mipuite chu hriselna ngai pawimawh fo thin tura chahin, pawnlera inthiar awm lohna district-a puan anih tawh avangin chenna hnaivai lutuka Ran In, zun leh ekte a awm lohna turin mihring hriselna ngaipawimawh chung zela ran vulh hna kalpui thiam turin a fuih a. Hmasawnna chu thil lian leh sum tam tak keng tel kher tur tihna ani lo a, mimal leh khawtlang nun hrisel neih leh intodelhna kawnga hlawhtlinna chante hi a tehna pawimawh tak a ni, a ti a. Mahni kut ke ngeia ding thei tura thiamna tuh tura hmalak chu a ngaihpawimawh thu sawiin, hmasawnna tak tak thlen tur chuan nun hrisel zawk zawha intodelh tuma theihtawp chhuah a tul thu a sawi bawk.

Khawtlang hruaitute hnen atanga khawtlang mamawh leh harsatna thlente a tul ang zela bawhzui sak a tum thu hrilhin mahni kutke ngeia ding thei tura tanla turin a chah a. Khualzin hipa sum lakluh anih theihna tura theihna nasa tak nei khuate chu faina nunpui tura fuihin, khualzip hip thei tur hmunhmate a tlawh bawk a ni.

Bawrhsap Pi Maria C.T Zuali hi Dr. Lallawmkima DIPRO leh Pu Obed Lalmalsawma DSYO te'n an tawiawm a ni.

Attachment

  • Loading attachment...