Myanmar leh Mizoram a Zofate inelna tura buatsaih Zofa Global Unity Badminton Championship chu nizan (16.2.2016) khan khuallian Champhai Bawrhsap Pu Vanlalngaihsaka chuan a hawng.
He Championship hawnna hun Govt. Champhai College Auditorium-a buatsaihah hian khuallian chuan inpumkhatna hi chakna a ni tiin Zohnahthlakte khawvel hmun hrang hranga awmte inhuikhawmna buatsaihtu ZGN leh Mizoram Badminton Association-te hmalakna chu fakawm a tih thu a sawi a. Zohnahthlakte ram rorelna a hran avangin ram hrang hrangah khawsa mah ila kan thlahtu bul thu hmun kan nih avangin inpawh taka kan awm a ngai a, hun zalen leh hlimawm hi kan hman ho fo atul a ni, a ti. hi Pu Lalnunmawia, Govt. Champhai College Principal leh Champhai District Badminton Association President chuan he hun hi a kaihruai a. Myanmar atang players lo kal te leh Mizoram Badminton Association aiawh ten thu an sawi bawk.
Zofa Global Unity Badminton Championship hi ZGN leh Mizoram Badminton Association leh Champhai District Badminton Association-te buatsaih niin, ram dang atangin mi 22 tel theiin mi 110 in inelna an nei dawn a. Tukin atang khan khelh tan niin, Men's Single leh Doubles; Kum 35 chin chunglam Doubles; Kum 45 chin chunglam Doubles leh Kum 50 chin chunglam Doubles bakah Mixed Doubles-ah te inelna hi a awm dawn a ni.
