Nimin (15.10.2019) khan Champhai Bawrhsap kalchhuak mai tur Dr Naveen Aggarwal, IAS chuan a Pisa-ah Champhai District MJA Member-te lengah sawmin inkawmhona leh inthlahna hun a neih pui.

Bawrhsap Dr Naveen Aggarwal chuan  Champhaia a hun hman a lo tawp tawh dawn tak avangin amah thlawpa thawhpuitu District mipuite chungah thinglung takin lawmthu a sawi a. Chanchinbumite nen thawhhona tha tak  hnuaia ram rawng an bawlhona leh  tawiawm thinna chu a fak a.  Champhai a awm chhunga hmalakna hrang hrangte tarlangin India ram Prime Minister in Kum 2022 a India rama Loneitute thawhchhuah a let a tihpun tuma hma  a lak mek bawhzuia Loneituten hlawk zawka buh leh bal an thar theihna turin hmalak ani, a ti a.  Champhai Leiletin buh leh bal tam zawk a thar theihna turin an mamawh Tui hnianghnar taka pekchhuah theihna tur leihnuai atanga tui lakchhuahna Shallow Tubewell Project atan NABARD kaltlangin Cheng nuai 10 hmuh anih thu a sawi a, Society anga kalp[uia hmalak theih dante thlenga ngaihtuah zui zel a that turte pawh a sawi a. Tui lakchhuahna tur hi I&WRD Line Department hmangin zirchianna te pawh neih mek a ni, a ti a.  Ngopa RD Block atana hman tur Oil India Limited  CSR kaltlanga Ambulance pek fel mai theih tura ruahmanl ani a ti bawk. School thlan bik atangin zirchianna hmasa atan hmeichhe tleirawlte Haemoglobin Test anih thu sawiin, thisen tlachham te zawnchhuah leh a tul ang zela enkawlna ngaihtuah sak anih tur thute tarlangin, hei hian nakin lawka nau nei mai tur hmeichhiate dinhmun leh hriselna nasa takin a lo pui lawk thei a ni, a ti a.  Champhai Circuit House thawmthata hman theiha peihfel anih chungchangah Sawrkar, Officer leh Staff-te chungah lawmthu a sawi a. Champhai District mipuite kalzelna turah duhsakna a hlan nghal a ni.

MJA Member-te pawhin Bawrhsap  kalchhuak tur an uina thu sawiin, Champhai  a  awm chhung reiloteah District tan hna nasa taka a thawh thu an sawi a. Naupang chaw tha ei leh hriselna lama inzirtirna Poshan Abhyaan kaltlanga Best Performing District in Mizoram nih theihna te, District Magistrate-na hnuaiah Champhai Police Station-in North East State zinga Police Station tha ber lawmman a la leh a kaihhruina hnuaia  MLA leh Lok Sabha inthlanna muanawm taka  neih a ni te chu lawmawm an tih thu an sawi a. District tana a  hmathlir neih hanthawh mek leh thawh turte a kaihhruaina ngei hmanga a hlawhtlinna hmuh an beisei rualin, a kalzelna turah duhsakna an hlan a. Champhai District chu Cooperative Societies  thang chakna anih ang ngeia a hna thar Registrar, Cooperative Societies a zawm hnuah pawh helam hawia ngaihtuahna seng zui turin an ngen a. Harsatna leh buaina awm chang pawha pa chan chang taka District mipuite a huikhawmna leh thalmuannaah lawmthu hrilhin a kalzelna turah duhsaknba an hlan a ni.

Champhai Bawrhsap Dr. Naveen Aggarwal hian July Ni 7, 2018 khan Champhai Bawrhsap hna a rawn chelh tan a, vawiin-ah hian a hna thar tur Registrar of Cooperative Societies  zawm turin Aizawl a pan tawh dawn a ni. Bawrhsap hi Pu Alexander V.Chongthu, Addl DC leh Dr Lallawmkima, DIPRO ten an tawiawm a. MJA lam hi an President Pu C.Lalhnunpuia’n a ho a ni.