Mizoram Blind Society chuan Nimin (15.10.2019) khan Mizorama a vawikhatna ni turin White Cane Day lawmna SCERT Auditorium, Aizawlah an buatsaih a. He programme-ah hian Social Welfare Minister of State Dr.K.Beichhua chu khuallian niin Social Welfare Joint Director Pi Vanlalzawni chu khual zahawm a ni.

Dr. K.Beichhua chuan White Cane Day chu mitdel te tan chauh ni lo Mizoram pum tan ni chhinchhiahtlak tak a ni, a ti a. He ni puala programme buatsaihtu Mizoram Blind Society te fakin pawl changtlung, thahnemngai leh tumruh an ni a, an thil tih tawh hlawhchham tum ngai lo mi an ni, a ti. Mihring vanneihna leh vanduaina a inchen lova, malsawmna leh hlawhtlinna pawh a teh dan a zir a ni, Minister chuan a ti a. Hamthatna tam tak dawngtu nia ngaih, chhungrila hlimna reng reng nei lo te hi khawvela mi vanduai ber an ni tiin mita hmu thei lo ni mahsela Pathian malsawmna kawng dang tam taka dawngtu an ni thung tih inhre turin a chah a ni. Mitdelte zingah Mizoram chhung ngeiah pawh mi hlawhtling tak tak, mita hmu thei tam tak te neih phak loh thiamna sang tak tak nei an awm tawh tih sawiin Pu K.Beichhua chuan an khaw hmuh theihlohna chu an nun tibeidawngtu nih tir lo tur leh hmalam pana kal zel turin a fuih a ni.

Minister hian mi sawmnga (50) tan tiang var (white cane) leh mobility aid a sem nghal bawk a ni.

Pi Vanlalzawni pawhin kalkhawmte chu mahni inrintawkna hloh lo tur leh tumruhna an neih phawt chuan mi tam tak tih theih loh thil ropui an ti thei a ni tih inhre turin a fuih a ni.

White Cane Day lawmna programme Mizoram Blind Society Adviser Pu Lalbuatsaiha kaihhruaiah hian Senior Adviser Prof. Chawngsailova’n thu a sawi a, an President Pu K.Lalhmingsanga’n inlawmna leh an pawl hmalakna report a pe a, mobility aid hman dan inzirtirna hun an hmang bawk.