No.6770/2020-2021

Dated Champhai, the 4th December, 2020: Vawiin khan Champhai District Bawrhsap Pi Maria C.T Zuali leh line department Official-te chuan India leh Myanmar ramri depa awm  Bulfekzawl khua chu tlawhin, khaw tih hmasawnna tur leh leilet phaizawl tangkai taka an hman theihna tura hmalak theihna tur kawng hrang hrangte VC, NGO, Water Users Association leh Farming Societies te  BNRGSK Bulfekzawlah an sawipui.

Pi Maria C.T Zuali chuan Bulfekzawl khawtlang hruaitute leh loneitute nena  inrawnkhawmna hun hlu tak hman a ni thei chu lawmawm a tih thu sawiin, felfai taka khawchhung remfel ani chu hmuh nuam a tih thu leh fakawm a tih thu a sawi a. Champhai district-ah  leilet zawl tha tak tak engemawzat a awm thu sawiin, leilet phai, terrace leh buh leh thlai chinna hmunte humhalha tangkai taka hman anih theihna tura tanlak a tul hle a ni, a ti bawk.

Mipuite sum leh pai dinhmun leh khawsak  tiziaawm tura tanho a ngaih thu sawiin, Covid-19 vanga intodelh lohna lo lang chu inzirtharna atana hman nise a duhawm hle ang, a ti a. Mahni khaw bil ei khawp chauh ngaihtuah lova hmun dang thlenga thawnchhuah thama tam thar thei tura taimak chhuah angai a, mithiamte rawn chung zelin a ram leilung mil zela hmalak a tul a ni, a ti. Covid-19 hrileng vangin project tharte duan nghal rup rup theih ni lo mahse mahni theuhah hmasawn tuma tanlak nise tiin, duhsakna dawng tlak tura tha leh zung seng turin a chah a. Khawtlangin harsatna an tawh leh mamawh an thlente a tul anga bawhzui zel tum anih thu a sawi bawk.

Pu Lalzorama SE, P&E chuan buh leh thlai chinna Agriculture land ah te kawlphetha pek vek tuma hmalak anih thu sawiin, Champhai Power Circle atana hmalakna turah Bulfekzawl leilet  project siamfela thehluh tawh anih thu a sawi bawk.

DRDA Champhai Project Director Pu R.Lalnghakliana chuan ni 100 inhlawhna kaltlangin kumin November thla thlenga ni 80 thawh tawh anih thu leh December thla ah ni 7 thawh leh tur a awm thu a sawi a. Bulfekzawl khawchhung cheina turte pawh a tul anga ngaihtuah tum a ni, a ti.

Pu George Lalthanngura, DAO Champhai pawhin thu sawiin, sawrkarin leilet a siam theih zawl zawng zawngte leileta siam vek a duh thu sawiin, ei leh bara kan la intodelh lohna chuan tanlakna chang min hriattir se a duhawm hle a ni, a ti a. Leilet siam mek leh hmabakte chinchhuaka chhuia departmenta thehlut turin a chah a. Harsatna an neihte department lama thlena mithiamte rawn zel turin a chah bawk.

Pu Laldingliana Hrahsel, EE, I&WRD Champhai chuan Bulfekzawla  Staff Lodge cum Site Office tuaihnum tum anih thu leh Solar equipment bunfel thuai tum ani, a ti.  Bulfekzawl leilet tui kawng siam thatna tur cheng nuai 40  ruahman  anih thu a sawi a. Champhai zawlah leihnuai atanga tuilakna tur project 4 kal pui mek anih thu sawiin, Bulfekzawl leh hmun dangahte pawh nakin zelah kalpui tum ani, a ti bawk.

Pu Sangthuama, Bulfekzawl VCP chuan Bawrhsapin khawtlang hmasawnna ngaihtuaha line department Official te hruaia hmalak theihna tur kawng hrang hrangte a hmun ngeia kalchilha an rawn enfiah chu lawmawm a tih thu a sawi a ni.

Bulfekzawl hi Khawbung RD Block huamchhunga awm niin chenna In 80 leh mihring cheng 430 bawr an awm mek a ni.

Champhai District Bawrhsap hi Pu Lalzorama SE, Champhai Power Circle, Pu R.Lalnghakliana PD DRDA, Pu George Lalthanngura DAO, Pu Laldingliana Hrahsel EE, I&WRD, Dr.Lallawmkima DIPRO, Pi Lalhriatpuii AEO, Pu V.L Hruaimawia DO, DM&R, Agriculture leh Irrigation &Water Resources Department Official te'n an tawiawm a ni.