No.6862/2020-2021

Vawiin khan Champhai District Bawrhsap Pi Maria C.T Zuali leh line department Official te chuan India leh Myanmar ramri dep Tiau kama awm  Laili Phai Hnahlan chu tlawhin,  leilet phaizawl tangkai lehzual hman anih theihna tura mamawh leh hmalak theihna tur kawng hrang hrangte VC leh Loneitute nen an enfiah.

Pi Maria C.T Zuali chuan Loneitute tan Champhaia kala Office dawr a harsat avangin a hmuna kalchilha Loneitute hmalakna enfiah an nih thu a sawi a. Champhai District chhunga leilet phai awmte tangkai taka hman anih theihna turin line department hrang hrangte tang hova hmalak tum anih thu a sawi a ni.

Vawiin hian Hnahlan atanga Laili Phai panna kawng FOCUS Project kaltlanga siamthat tum enfiah hmasak a ni a. Laili Phai chawmtu ber Tuilak Lui Minor Irrigation Project hmanga tuilakna pawh enfiah nghal niin, Loneitute chu a chhawr tangkaitu an nih angin a enkawl leh venhim kawngah tan la lehzual tura chah an ni a. Blue Revolution hnuaia Sangha khawi mi 3 te hmunhma pawh enfiah sak an nih bakah Pradhan Mantri Matsya Sampada Yajona (PMMSY) kaltlanga Sangha dil siam dilte pawh enfiah sak nghal an ni bawk. 

Heng bakah hian Leilet phaia thlai chinte ran laka a him theihna tura a hungna siam anih theih dan turte bakah leilet bial te lutuk thiata tihlen anih theih dan tur kawngte sawihoa enfiah nghal a ni bawk. Loneitute chu an hnathawhna hmunahte kalchilh niin mamawh leh harsatna an thlente mithiam ten an enfiah puia, tuilakna pipe mamawhte chu DAO in pek an nih tur thu a hrilh bawk.

Fostering Climate Resilient Upland Farming Systems in the North East (FOCUS) project hmalaknain Hnahlan khuaah thlasik thlai ching tura hmalak a ni a, FOCUS WRC FIG member chhungkaw 110 te  Zikhlum, Parbawr leh Tomato te chin tir an ni. Champhai district chhungah Hnahlan Circle chu hetiang thlai chi te ching tura  thlan an nih avangin  FOCUS District Project Manager Pu George Lalthanngura DAO Champhai chuan  thlan bik an nihna angin hlawhtlinpui ngei thei tura theihtawp chhuah turin a fuih a ni.

Champhai District Bawrhsap hi Pu George Lalthanngura DAO & DPM FOCUS, Pu Laldingliana Hrahsel EE, I&WRD, Dr. Lallawmkima DIPRO, Pu Lalhmunsanga DFDO leh Pu Vanlalvuana Rokhum SDHO te'n an tawiawm a ni.